To‘dako‘l suv ombori yagona boshqaruv asosida zamonaviy turizm va rekreatsiya hududiga aylantiriladi
2026-09-27 14:25:00 / Yangiliklar
O‘zbekiston Respublikasi Prezidentining 2026-yil 3-sentyabrdagi PQ-313-sonli qarori asosida Qiziltepa hududida 6,5 ming gektar bo‘lgan “To‘dako‘l” turistik-rekreatsion zonasini tashkil etish bo‘yicha vazifalar belgilangan. Toʻdakoʻl suv havzasi respublikadagi yirik suv obyektlaridan biri boʻlib, mazkur hududda eko, ov, ekstremal, rekreatsion, tibbiy-sogʻlomlashtirish hamda gastronomik turizm kabi yoʻnalishlarini rivojlantirishda yuqori salohiyat mavjud.
Toʻdakoʻl suv omborining umumiy maydoni 21,7 ming gektar boʻlib, 14 km sohil qismida plyaj va zamonaviy turistik infratuzilma yaratish imkoniyati mavjud. Yangi loyihaga ko‘ra, hududda ekoturizm, ov, ekstremal, rekreatsion, tibbiy-sog‘lomlashtirish va gastronomik turizmni rivojlantirish rejalashtirilmoqda.
O‘rganishlar davomida tadbirkorlik subyektlari ishtirokida hududdagi 30 ga yaqin tadbirkorlik subyektlari tomonidan tashkil etilgan turli obyektlar koʻzdan kechirildi.
Hududga oid yagona master reja ishlab chiqqan holda zamonaviy turistik xizmatlarni yoʻlga qoʻyish va muhandislik kommunikatsiya tarmoqlarini tashkil etish maqsadida tegishli masʼullar ishtirokida yigʻilish oʻtkazilib, ustuvor vazifalar belgilab olindi.
Kelgusidagi vazifa mavjud obyektlarni alohida-alohida rivojlantirish emas, balki Toʻdakoʻlni yagona boshqaruv asosida kompleks turistik-rekreatsion hududga aylantirish hisoblanadi.