O‘zbekiston xalqaro turistlar oqimi o‘sishi bo‘yicha Yevropa yo‘nalishlari orasida yetakchi bo‘ldi
2026-09-22 16:40:00 / Yangiliklar
Xususan, mamlakatga tashrif buyurgan xalqaro turistlar oqimi 2025-yil darajasiga nisbatan 25 foizga oshib, O‘zbekistonning global turizm makonidagi mavqei izchil mustahkamlanib borayotganini ko‘rsatdi.
Hisobotga ko‘ra, 2026-yilning yanvar-iyun oylarida dunyo bo‘ylab qariyb 690 million xalqaro turist qayd etilgan. Global o‘sish 0,4 foizni, Yevropada esa 3 foizni ko‘rsatishi O‘zbekistonning 25 foizlik natijasi mamlakat turizmida kuzatilayotgan yuqori sur’atni yaqqol namoyon etdi.
Global tendensiyalar fonida O‘zbekiston sayyohlik faolligining yanada ta’sirchan o‘sishini ko‘rsatmoqda. 2026-yilning dastlabki 6 oyida mamlakatga 6,6 milliondan ortiq turist tashrif buyurdi.
Erishilgan natija transport aloqalarini kengaytirish, kirish tartib-taomillarini soddalashtirish, turistik mahsulotlarni diversifikatsiya qilish hamda O‘zbekiston brendini xalqaro bozorlarda faol targ‘ib etish bo‘yicha amalga oshirilayotgan chora-tadbirlarning amaliy samarasidir.
O‘zbekistonning UN Tourism reytingida yetakchi o‘rinni egallashi 2030-yilgacha xorijiy turistlar sonini 20 million nafarga yetkazish bo‘yicha belgilangan maqsadlarga erishish uchun muhim zamin yaratadi.