O‘zbekiston Respublikasi Turizm qo‘mitasi

Tadbir O‘zbekiston Respublikasi Turizm qo‘mitasi ko‘magida “Centrum Air” aviakompaniyasi bilan hamkorlikda Toshkent — Karachi yo‘nalishi bo‘yicha to‘g‘ridan to‘g‘ri aviaqatnovlarni yo‘lga qo‘yish munosabati bilan tashkil etilgan tanishuv safari (FAM Trip) doirasida o‘tkazildi.

B2B uchrashuvida 2026-yil 10–12-sentyabr kunlari O‘zbekistonda bo‘lib turgan FAM Trip doirasida Karachi shahri turistik biznesining 10 nafar vakili ishtirok etdi. Muzokaralar davomida xorijiy ishtirokchilar O‘zbekiston turoperatorlari vakillari bilan uchrashib, hamkorlikning istiqbolli yo‘nalishlarini muhokama qildilar.

Uchrashuvda asosiy e’tibor O‘zbekistonning turistik salohiyatini taqdim etish va uni Pokiston bozorida ilgari surish imkoniyatlariga qaratildi. Pokistonlik biznes vakillariga mavjud turistik mahsulotlar va istiqbolli yo‘nalishlar, jumladan, Toshkent, Samarqand, Buxoro va Xiva bo‘ylab tarixiy-madaniy marshrutlar, Buyuk Ipak yo‘li obyektlari bo‘ylab sayohatlar, shuningdek, gastronomik, ekologik va ziyorat turizmini rivojlantirish imkoniyatlari taqdim etildi.

Shuningdek, ishtirokchilar turistik paketlarni birgalikda ishlab chiqish va ilgari surish, yangi marshrutlarni shakllantirish, sayyohlarning O‘zbekistonda bo‘lish muddatini uzaytirish hamda sayohatlar geografiyasini kengaytirish masalalarini muhokama qildilar. Muzokaralarda ikki mamlakat turoperatorlari o‘rtasida to‘g‘ridan to‘g‘ri hamkorlikni yo‘lga qo‘yish va Pokistonlik sayyohlarning qiziqishlarini inobatga olgan holda yangi turistik takliflarni ishlab chiqishga alohida e’tibor qaratildi.

Karachi va Toshkent o‘rtasida to‘g‘ridan to‘g‘ri aviaqatnovning yo‘lga qo‘yilishi turistik almashinuvni faollashtirishda muhim omil sifatida baholanmoqda. Yangi aviaqatnov «Karachi — Toshkent — Samarqand» yo‘nalishi bo‘yicha kompleks turpaketlarni shakllantirish, keyinchalik esa O‘zbekistonning boshqa turistik markazlarini ham sayohat dasturlariga kiritish uchun qo‘shimcha imkoniyatlar yaratadi.

FAM Trip doirasida Karachi shahri turistik biznesi vakillari Toshkent va Samarqand shaharlarida ham bo‘lib, ularning tarixiy-madaniy merosi, turistik obyektlari va zamonaviy infratuzilmasi bilan tanishdilar. Safar davomida olingan taassurotlar ishtirokchilarga O‘zbekistonning turistik imkoniyatlari va ularni Pokiston bozorida ilgari surish istiqbollarini bevosita baholash imkonini berdi.

Ikki mamlakat turistik biznesi vakillari ishtirokida B2B muzokaralarining o‘tkazilishi yangi ishbilarmonlik aloqalarini yo‘lga qo‘yish, qo‘shma turistik mahsulotlarni ishlab chiqish va o‘zaro turistik oqimni oshirish uchun mustahkam zamin yaratadi.

O‘zbekiston va Pokiston turoperatorlari o‘rtasida to‘g‘ridan to‘g‘ri hamkorlikning rivojlanishi O‘zbekistonning turistik salohiyatini Karachi shahri va Pokistonning boshqa hududlari bozorida yanada keng targ‘ib qilish, shuningdek, ikki mamlakat o‘rtasida turizm sohasidagi amaliy hamkorlikni mustahkamlashga xizmat qiladi.