Turizmdagi gʻoyangiz uchun 1 milliard soʻm: startaplarga subsidiya berish tartibi tasdiqlandi
2026-09-09 16:30:00 / Yangiliklar
Reglamentga koʻra, subsidiya Turizm qoʻmitasi huzuridagi byudjetdan tashqari Turizmni qoʻllab-quvvatlash jamgʻarmasi mablagʻlari hisobidan ajratiladi. Startapni ishlab chiqish va amaliyotga joriy etish xarajatlarining 50 foizi (biroq 1 mlrd soʻmdan oshmagan miqdorda) qoplanadi va har yili eng yaxshi 10 tagacha loyiha qoʻllab-quvvatlanadi. Subsidiya bitta talabgorga bir kalendar yilda bir marta beriladi.
Talabgorda hujjat topshirish sanasida soliq va yigʻimlar boʻyicha qarzdorlik boʻlmasligi, shuningdek u bankrotlik yoki tugatish jarayonida boʻlmasligi shart.
Ariza Davlat xizmatlari markazi yoki Yagona interaktiv davlat xizmatlari portali (my.gov.uz) orqali Turizm qoʻmitasiga topshiriladi, unga startapni amaliyotga joriy etish boʻyicha biznes-reja va loyiha taqdimoti ilova qilinadi. Arizalar har chorak yakunining 20-sanasidan 25-sanasigacha, toʻlovsiz qabul qilinadi.
Ariza kelib tushgan kundan besh ish kunida talabgorga suhbat haqida xabarnoma yuboriladi. Suhbat videokonferensaloqa orqali yoki talabgorning shaxsan ishtirokida oʻtkaziladi va unda talabgor oʻz startapini komissiyaga taqdim etadi. Komissiya oʻn ish kunida loyihaning belgilangan talablarga mosligini oʻrganadi, Jamgʻarma kengashining ijobiy xulosasini oladi va subsidiya ajratish maqsadga muvofiqligi toʻgʻrisida xulosa beradi.
Baholashda quyidagilar eʼtiborga olinadi:
startapning maʼlum turistik xizmatni rivojlantirishga qaratilgani;
bugungi kunda turistlar uchun dolzarbligi hamda avval mavjud boʻlmagan yoki sezilarli takomillashtirilgan yechim taqdim etishi.
Qoʻmita komissiya xulosasi asosida ikki ish kunida qaror qabul qiladi; ijobiy qaror chiqsa, mablagʻ yetti ish kunida talabgorning tijorat bankidagi hisobvaragʻiga oʻtkaziladi.