O‘zbekiston Respublikasi Turizm qo‘mitasi

Bunda tijorat banklari mehmonxona qurish va rekonstruksiya qilish uchun 2-yillik imtiyozli davr bilan 10-yilgacha muddatga milliy valyutada yillik 16 foizli kreditlar ajratadi. Xorijiy valyutada ham kreditlar ajratiladi, bunda SOFR, EURIBOR yoki SHIBOR stavkalaridan oshgan foiz xarajatlarini "Tadbirkorlikni rivojlantirish kompaniyasi" AJ qoplaydi.

Turizm infratuzilmasini rivojlantirish maqsadida, uch, to‘rt va besh yulduzli mehmonxonalarni qurish subsidiyasi 2029-yilning 1-yanvariga qadar uzaytirildi. Shuningdek, yulduzli mehmonxona subsidiyasi uchun toifani tasdiqlashda xorijiy kompaniya xulosasi endi talab etilmaydi. Ma’lumot uchun, so‘nggi 3-yilda yulduz toifasiga ega 32 ta mehmonxona qurilib, ularga davlat byudjetidan subsidiya sifatida 156 milliard so‘mdan ortiq mablag‘ to‘lab berildi.

Mehmonxonalarning mol-mulk va yer solig‘iga 0,1 koeffitsiyent qo‘llash muddati 2030-yil 1-yanvarga qadar uzaytirildi. Mehmonxona, shu jumladan palatka va o‘tovli lagerlari uchun yer va mol-mulk solig‘ining 90 foizga kamaytirilishi 2030-yil (lagerlar uchun 2037-yil) 1-yanvarga qadar amal qiladi.

Turizm subyektlari uchun import qilinadigan avtobus, elektrobus va mikroavtobuslarni bojxona bojidan ozod etish muddati 2028-yil 1-yanvarga qadar uzaytirildi. O‘rindiqlari soni sakkizdan ortiq mikroavtobuslar ham ushbu imtiyozga kiritilib, ular utilizatsiya yig‘imidan ham ozod etildi.

Turoperatorlarning xorijiy sayyohlarga ko‘rsatgan xizmati eksportga tenglashtirilib, 2027-yil 1-yanvardan QQSdan ozod etilmoqda.

Mehmonxona va umumiy ovqatlanish subyektlari suv, ichimlik, pivo va tamaki mahsulotlari xarid qilganda, ularga biriktirilgan raqamli markirovka kodlari yakuniy iste’molga realizatsiya qilingan deb hisoblanadi — qayta sotish nazorati talab etilmaydi. Shuningdek, 2026–2027-yillarda bosqichma-bosqich 50 tadan ortiq xonali mehmonxonalarda naqd valyuta ayirboshlash shoxobchalari va bankomatlari tashkil etiladi.

Shu bilan birga, 2026-yil noyabrga qadar turistik yig‘imni joylashish narxiga qarab qayta belgilash, mehmonxonalar uchun avtoturargoh tashkil etish talabi hamda 10 nafardan ortiq guruh olib keluvchi turoperatorlar uchun madaniy meros obyektlariga 30 foizgacha chegirmani nazarda tutuvchi Prezident qarori loyihasi ishlab chiqiladi. Ushbu takliflar hozircha loyiha bosqichida bo‘lib, tegishli Prezident qarori rasman qabul qilingach, yuqoridagi imtiyozlar tadbirkorlar uchun rasman kuchga kiradi.