O‘zbekiston Respublikasi Turizm qo‘mitasi

Muallif diqqat markazida nafaqat Ipak yo‘lining jahonga mashhur merosi, balki zamonaviy O‘zbekiston ushbu merosni qanday qilib yangi sayyohlik mahsulotining mustahkam asosiga aylantirayotgani turadi.

Muallif o‘z sayohatini zamonaviy O‘zbekiston bilan tanishish uchun boshlang‘ich nuqta bo‘lgan Toshkentdan boshlaydi. Dastlabki manzillardan biri sifatida u moviy gumbazli va ko‘plab savdo rastalariga ega mashhur Chorsu bozorini tanlaydi.

“Men birinchi bekat sifatida Toshkentdagi Chorsu bozorini tanladim Zero, nazarimda, Ipak yo‘li ruhini bundan-da yaxshiroq aks ettiradigan va ayni paytda u haqdagi afsonalarni yo‘qqa chiqaradigan boshqa biror joy topilmasa kerak. Bozorning sovet davrida qurilgan paviloni qariyb 2000 yildan buyon savdo-sotiq qilinadigan joyda qad rostlab turibdi va u bugungi kunda ham Ipak yo‘lining asl mohiyati bo‘lmish savdoni o‘zida mujassam etadi”.

Maqolada O‘zbekistonning asosiy tarixiy markazlaridan biri bo‘lgan Samarqand alohida o‘rin egallaydi.

“Agar siz O‘zbekiston suratlarini ko‘rgan bo‘lsangiz, mashhur Registon maydonini o‘rab turgan uch madrasaning moviy, firuza, sariq tusdagi ulug‘vor peshtoqlari sizga tanish bo‘lsa kerak. Ularning nihoyatda serhasham bezatilgan darvozalari bir paytlar Samarqandning “Sharq Oksfordi” deb atalishiga sabab bo‘lgan sobiq ta’lim dargohlariga olib boradi”, — deya ta’kidlaydi muallif.

Sayohatning ikkinchi yirik tarixiy markazi Buxoro hisoblanadi. Muallif shaharning tarixiy markazi ixcham va yaxlit ekaniga e’tibor qaratib, bu yerda zamonaviy imoratlar tarixiy shahar muhitiga boshqa joylarga nisbatan kamroq ta’sir etganini qayd etadi.

Eng diqqatga sazovor obidalar qatorida u Ark qal’asi, Buxoroning tarixiy markazi va o‘zining mashhur g‘ishtin minorasi bilan tanilgani Kalon masjidini alohida qayd etadi.

Nashrning muhim jihati shundaki, muallif O‘zbekiston haqidagi faqat qadimiy yodgorliklar va Buyuk Ipak yo‘li shaharlari mamlakati degan klassik tasavvur bilangina cheklanib qolmaydi.

Maqolada zamonaviy turizm infratuzilmasi, mehmonxonalar, transport, gastronomiya, bozorlar hamda yangi turistik yo‘nalishlar va formatlarga ham alohida e’tibor qaratilgan.

Mazkur maqola O‘zbekistonni xalqaro auditoriyaga sayohatchining shaxsiy tajribasi orqali tanishtirib, mamlakatni boy tarixiy meros, qadimiy shaharlar me’morchiligi, madaniyat, gastronomiya va rivojlanib borayotgan turizm infratuzilmasi uyg‘unlashgan sayyohlik yo‘nalishi sifatida namoyon etadi.

Shu bilan birga, maqola nafaqat Ipak yo‘lining mashhur yodgorliklariga, balki mamlakatning zamonaviy turizm industriyasida yuz berayotgan o‘zgarishlarga ham e’tibor qaratadi.

Muallifning bahosiga ko‘ra, O‘zbekistonning sayyohlik tarmog‘i jadal rivojlanmoqda. U o‘tgan yili xorijiy sayyohlar soni qariyb 12 millionni tashkil etganini, bundan o‘n yil avval esa bu ko‘rsatkich qariyb 2 million nafarni tashkil etganini qayd etadi. Shuningdek, muallif mamlakatning 2030-yilgacha 20 million sayyohni jalb etishdek ulkan maqsadini ham alohida ta’kidlaydi.

National Geographic nashri O‘zbekistonni xalqaro miqyosda targ‘ib qilish yo‘lida alohida ahamiyatga ega, chunki unda mamlakat nafaqat alohida sayyohlik obyektlari orqali, balki yaxlit turistik tajriba sifatida namoyon etilgan.

Muallif O‘zbekistonni Markaziy Osiyoning o‘ziga xos mamlakati sifatida ajratib ko‘rsatib, mamlakatning turistik salohiyatini targ‘ib qilishda o‘ziga xos va yaxshi tanilgan brendni tanlaganini ta’kidlaydi.

“Har bir mamlakatning sayyohlarga taqdim etadigan o‘ziga xos afsona va timsollari bor, masalan: AQShda — kovboylar, Ispaniyada — korrida, Germaniyada esa — kolbasalar. Shu bois O‘zbekiston kabi rivojlanayotgan mamlakat badavlat sayyohlarni jalb qilish maqsadida o‘zining tarixiy merosidan foydalanishga, yo‘lovchi poyezdlaridan tortib savdo markazlarigacha — hamma narsada “Ipak yo‘li” yozuvi va tuya karvonlari tasvirini qo‘llashga intilishi tabiiy holdir” , — deb yozadi muallif.

Shuni alohida ta’kidlash joizki, yetakchi xalqaro ommaviy axborot vositalarida e’lon qilinayotgan bunday materiallar O‘zbekistonning xalqaro imijini mustahkamlashga, mamlakatni eng istiqbolli va jozibador sayyohlik yo‘nalishlaridan biri sifatida namoyon etishga xizmat qiladi.