Germaniya va Fransiyadan sayyohlarni jalb qilish masalalari muhokama qilindi
2026-08-10 10:10:00 / Yangiliklar
Muloqot davomida Germaniya va Fransiya bozorlaridan O‘zbekistonga turistik oqimni ko‘paytirish jarayonida yuzaga kelayotgan mavjud muammolar atroflicha muhokama qilinib, ularni bartaraf etish bo‘yicha amaliy taklif va yechimlar ko‘rib chiqildi.
Shuningdek, O‘zbekistondagi turistik infratuzilmani yanada rivojlantirish, transport-logistika imkoniyatlarini kengaytirish, xorijiy sayyohlar uchun sayohatlarni tashkil etish jarayonidagi mavjud to‘siqlarni bartaraf etish va xizmatlar sifatini oshirish masalalari yuzasidan fikr almashildi.
Uchrashuvda O‘zbekistonning turistik salohiyatini Germaniya va Fransiya bozorlarida keng targ‘ib qilishning samarali usullari ham muhokama qilindi. Xususan, maqsadli PR va marketing kampaniyalarini tashkil etish, turistik mahsulotlarni xorijiy auditoriyaga ilgari surish hamda mazkur bozorlarda O‘zbekistonning turistik brendini yanada kuchaytirish bo‘yicha tavsiyalar bildirildi.
Uchrashuv yakunida Germaniya va Fransiyadan turistlar oqimini oshirish, hamkorlikni kengaytirish va O‘zbekistonni ushbu bozorlarda yanada faol targ‘ib qilishga qaratilgan qator istiqbolli yo‘nalishlar belgilab olindi.