"EURONEWS" Surxondaryoning betakror tabiati va ekoturizm salohiyatini dunyoga namoyish etadi
2026-07-23 17:00:00 / Yangiliklar
Tasvirga olish jarayonlari Termiz xalqaro aeroportidan Qumqo‘rg‘on tumani tomon yo‘nalishda joylashgan Qattaqum yarimcho‘lida tashkil etildi. Mazkur hudud o‘ziga xos tabiiy muhiti bilan ajralib turadi. Bu yerda yuqori harorat va qurg‘oqchilik sharoitiga moslashgan saksovul, juzg‘un, chezgen kabi o‘simliklar tabiiy holda o‘sadi.
Shuningdek, telekanal ijodkorlari Qumqo‘rg‘on tumanidagi intensiv olma bog‘ida hamda Jarqo‘rg‘on tumanidagi 1800 gektar maydonda barpo etilgan bodomzorlarda ham suratga olish ishlarini olib bordi. Lavhalarda viloyatda qishloq xo‘jaligi sohasida amalga oshirilayotgan islohotlar, eksportbop mahsulotlar yetishtirish tajribasi va zamonaviy bog‘dorchilik tizimi keng yoritiladi.
Tayyorlanayotgan ko‘rsatuv orqali Surxondaryoning betakror tabiati, turizm imkoniyatlari, agrar salohiyati va investitsiyaviy jozibadorligi xalqaro auditoriyaga yanada keng tanitiladi.
Surxondaryo viloyati haqidagi maxsus dastur avgust oyida "EURONEWS" telekanali orqali efirga uzatiladi.