Ummonlik inflyuenserlar va turoperatorlar O‘zbekistonning turistik salohiyati bilan tanishmoqda
2026-07-05 10:30:00 / Yangiliklar
Safarning birinchi kunida mehmonlar Toshkent shahrining asosiy diqqatga sazovor maskanlari, jumladan, Islom sivilizatsiyasi markazi bilan tanishdilar. Dastur Toshkent viloyatida davom ettirilib, ularga O‘zbekistonning tog‘ turizmi imkoniyatlari “Amirsoy” tog‘-chang‘i kurorti misolida namoyish etildi.
Keyingi kunlarda ishtirokchilar Jizzax viloyatidagi Zomin turistik-rekreatsion hududiga, shuningdek, Samarqand shahriga tashrif buyuradilar. U yerda ular hududlarning tarixiy-madaniy merosi, zamonaviy turizm obyektlari, mehmonxona infratuzilmasi va transport tizimi bilan yaqindan tanishadilar.
Safar yakunlari bo‘yicha O‘zbekistonning turistik imkoniyatlari Ummonning ijtimoiy tarmoqlari hamda professional turizm platformalarida keng yoritilishi kutilmoqda. Bu esa O‘zbekistonga sayohat qilishga bo‘lgan qiziqishni oshirish va mamlakatimizni jozibador turistik yo‘nalishlardan biri sifatida targ‘ib etishga xizmat qiladi.