Yoshlar uchun tashkil etilgan «Orol dengiziga poyezd» aksiyasi ishtirokchilarni Orolbo‘yi hududining turistik salohiyati bilan tanishtirishda davom etmoqda
2026-05-23 17:00:00 / Yangiliklar
Dasturning ikkinchi kuni ishtirokchilar tarixiy-madaniy meros obyektlariga tashrif buyurib, Qoraqalpog‘istonning an’analari va o‘ziga xos madaniyati bilan tanishdilar. Ekomarafon doirasida yoshlar uchun atrof-muhitga ehtiyotkorona munosabatni shakllantirish va Orol dengizi hududidagi ekologik muammolarga e’tibor qaratishga qaratilgan ekologik aksiyalar hamda hududlarni ko‘kalamzorlashtirish tadbirlari tashkil etildi.
Ishtirokchilar uchun, shuningdek, folklor jamoalari ishtirokida madaniy dastur tayyorlandi hamda qoraqalpoq milliy yurtasini o‘rnatish jarayoni namoyish etildi. Bu etnografik turizm elementlaridan biri bo‘lib, xalqning milliy an’analari va turmush tarzini aks ettiradi.
Kun yakunida yoshlar Nukus shahridagi Orolbo‘yi xalqaro innovatsion markaziga tashrif buyurib, hududning ekologik muammolari va Orolbo‘yi tabiiy merosini asrash masalalariga bag‘ishlangan ekspozitsiya bilan tanishdilar.
O‘zbekiston Respublikasi Turizm qo‘mitasi ekologik, madaniy va etnografik turizmni rivojlantirish, shuningdek, yoshlarni mamlakat hududlarining turistik salohiyatini o‘rganishga jalb qilish va ichki turizmni yoshlar o‘rtasida ommalashtirishga alohida e’tibor qaratmoqda.