O‘zbekiston Respublikasi Turizm qo‘mitasi

Dasturining birinchi kunida yoshlar “Shayx Jalil bobo” ziyoratgohiga hamda bugungi kunda ekologik va ma’rifiy turizmning istiqbolli yo‘nalishlari sifatida qaralayotgan hududning tabiiy landshaftlariga tashrif buyurdilar. Tashrif davomida atrof-muhitga ehtiyotkorona munosabatni shakllantirish va Orolbo‘yining tabiiy merosini yoshlar orasida targ‘ib qilishga qaratilgan ekologik aksiyalar hamda ma’rifiy tadbirlar tashkil etildi.

Shuningdek, Amudaryo tumanida joylashgan “Chilpiq” tarixiy yodgorligiga tashrif uyushtirildi. Ushbu obyekt mamlakatimizning mashhur madaniy meros maskanlaridan biri bo‘lib, mahalliy va xorijiy turistlar orasida katta qiziqish uyg‘otadi. Yodgorlik hududida mintaqaning tarixiy-madaniy va tabiiy boyliklariga bag‘ishlangan yosh rassomlar tanlovi o‘tkazildi.

Turizm qo‘mitasi ichki, ekologik va ziyorat turizmini rivojlantirish, shuningdek, Orolbo‘yi hududining turizm salohiyatini targ‘ib qilishga alohida e’tibor qaratmoqda. Bunday tashabbuslar yoshlarni Qoraqalpog‘istonning noyob turistik yo‘nalishlari bilan tanishtirish, mamlakat hududlari bo‘ylab sayohatlarga qiziqishni oshirish hamda yosh avlod orasida ekologik madaniyatni shakllantirishga xizmat qiladi.