O‘zbekiston Respublikasi Turizm qo‘mitasi

Uch kun davom etgan festival doirasida ko‘rgazmalar, mahorat darslari, teatrlashtirilgan chiqishlar, milliy liboslar namoyishi, hujjatli filmlar taqdimoti va konsert dasturlari mehmonlarga unutilmas taassurotlar ulashdi. Ayniqsa, taniqli ustalarning amaliy ishlari xalqimiz hunarmandchiligining naqadar yuksak san’at darajasiga chiqqanini yana bir bor namoyon etdi.

Bayram Ark qal’asidan Labi Hovuz ansambligacha tantanali yurish bilan boshlandi. Hunarmandlar tomonidan taqdim etilgan ishlar Oʻzbekiston milliy hunarmandchilik anʼanalarining boyligi va yuksak badiiy darajasini yana bir bor namoyon etdi.

Festival doirasida “Anʼanaviy zardoʻzlik va zargarlik sanʼatini rivojlantirish istiqbollari” mavzusidagi ilmiy-amaliy konferensiyada milliy hunarmandchilik an’analarini asrab-avaylash, zargarlik hamda zardo‘zlik san’atini zamonaviy yondashuvlar asosida rivojlantirish, yosh ustalarni qo‘llab-quvvatlash va sohada xalqaro hamkorlikni kengaytirish masalalari muhokama qilindi. “Buxoro zandanachisi: tarixi, tipologiyasi va qayta tiklash masalalari” mavzusida xalqaro simpoziumda esa soha mutaxassislari, olimlar, hunarmandlar va yosh ijodkorlar ishtirok etib, o‘z tajriba va takliflari bilan o‘rtoqlashdilar. 

Tadbirda jahonning 50 ga yaqin mamlakatidan hamda yurtimizning turli hududlaridan 600 nafardan ortiq hunarmand, olim, faxriy mehmon va ommaviy axborot vositalari vakillari ishtirok etdi. Bu Buxoroning madaniy merosiga boʻlgan xalqaro qiziqish tobora ortib borayotganini va uning mintaqadagi hunarmandchilik turizmining muhim markazlaridan biri sifatidagi maqomini yana bir bor tasdiqladi.

Festivalning tantanali yopilish marosimi Ark qal’asi maydonida boʻlib oʻtdi va teatrlashtirilgan tarixiy kompozitsiyalar, xalq jamoalari va san’atkorlar ishtirokidagi go‘zal konsert dasturi bilan yanada fayzli tus oldi. 

Marosimda festival doirasida mahalliy va xorijiy hunarmandlar oʻrtasida oʻtkazilgan koʻrik-tanlov gʻolib va sovrindorlari “Eng yaxshi zargarlik tashkiloti”, “Eng yaxshi zardoʻzlik tashkiloti”, “Eng yaxshi zardoʻz”, “Eng yaxshi zargar”, “Eng yaxshi zardoʻzlik maktabi ustasi”, “Eng yaxshi zargarlik maktabi ustasi”, “Zardoʻzlik boʻyicha qadimiy sulola davomchisi”, “Zargarlik boʻyicha qadimiy sulola davomchisi”, “Qadimiy anʼanalarni qayta tiklagan zardoʻz”, “Qadimiy anʼanalarni qayta tiklagan zargar”, “Eng yosh mahoratli zardoʻz”, “Eng yosh mahoratli zargar” kabi nominatsiyalar boʻyicha tantanali ravishda taqdirlandi.

2022-yilda “Jahon hunarmandchilik shahri” maqomini olgan Buxoro yana bir bor oʻzining boy madaniy merosi, noyob hunarmandchilik an’analari va sharqona mehmondoʻstlik muhitini dunyoga namoyish etdi. Bu esa Oʻzbekistonning madaniy-ma’rifiy turizmning jozibador yoʻnalishlaridan biri sifatidagi mavqeini yanada mustahkamladi.