O‘zbekiston Respublikasi Turizm qo‘mitasi

Anjumanda ta’kidlanganidek, O‘zbekiston Respublikasi Prezidentining 2025 yil 19 noyabrdagi PQ-348-sonli qarori bilan Turizm qo‘mitasi faoliyati tashkil etilgan bo‘lib, mazkur hujjat bilan 2030 yilgacha turizm sohasini rivojlantirishning ustuvor vazifalari belgilab berilgan. Xususan, turizmning yalpi ichki mahsulotdagi ulushini 7 foizga yetkazish, xorijiy turistlar sonini 20 million nafarga olib chiqish hamda turizm xizmatlari eksportini 6 milliard AQSh dollaridan oshirish maqsad qilingan.

Shuningdek, joriy yil 15 yanvar kuni davlat rahbariga sohada amalga oshiriladigan ishlar yuzasidan taqdimot o‘tkazilgani, Prezident topshiriqlariga asosan respublika ishchi guruhi tomonidan hududlarda keng qamrovli o‘rganishlar olib borilgani qayd etildi. Uchrashuvlar davomida 1 500 dan ortiq tadbirkorlar bilan muloqot qilinib, 200 dan ziyod masala ko‘tarilgan. Ularning aksariyati 2026 yil 30 aprelda qabul qilingan PQ-161-sonli qarorda o‘z aksini topgan.

Matbuot anjumanida mazkur qarorning mazmun-mohiyatiga alohida to‘xtalib o‘tildi. Qarorga muvofiq, 2026–2027 yillarda hududlarda turizmni rivojlantirish bo‘yicha maqsadli ko‘rsatkichlar belgilangan bo‘lib, sohada 40 mingta yangi ish o‘rni yaratish rejalashtirilgan. Shuningdek, turizm sohasini loyiha boshqaruvi tizimi asosida tashkil etish mexanizmi joriy qilinmoqda.

Endilikda “jozibador manzil – loyiha – infratuzilma – tadbirkor – targ‘ibot – sayyoh” zanjiri asosida tizimli ishlash yo‘lga qo‘yiladi. Bu orqali 34 ta yirik turizm obyekti uchun master rejalar ishlab chiqilib, 31 ta yangi turizm obyekti tashkil etiladi va rivojlantiriladi.

Jumladan, Qoraqalpog‘iston Respublikasining Amudaryo tumanida “Qipchoq baliqchilar ovuli” turistik maskani loyiha boshqaruvi asosida rivojlantiriladi. Bu kabi loyihalarni samarali amalga oshirish maqsadida Turizm qo‘mitasi huzurida “Turizm infratuzilmasini rivojlantirish bo‘yicha loyiha ofisi” davlat muassasasi tashkil etilmoqda.

Anjumanda turizm infratuzilmasini rivojlantirish uchun joriy yilda 950 milliard so‘m mablag‘ yo‘naltirilayotgani ma’lum qilindi. Ushbu mablag‘lar yo‘llarni ta’mirlash, muhandislik kommunikatsiyalarini tortish, sanitariya shoxobchalarini tashkil etish, sohil bo‘ylarini obodonlashtirish kabi yo‘nalishlarga sarflanadi.

Shu bilan birga, joylashtirish vositalari sonini 8 ming 250 taga, xonalar sonini esa 95 mingtaga yetkazish rejalashtirilgani qayd etildi. Turizmning ekologik, etno, ziyorat, gastronomik, tibbiy, sport va MICE kabi turlarini rivojlantirish maqsadida “Turistik mahsulotlarni rivojlantirish bo‘yicha loyiha ofisi” ham tashkil etilmoqda.

Matbuot anjumanida global turizm tendensiyalari haqida ham fikr yuritildi. Bugungi kunda sayyohlar sun’iy intellekt texnologiyalari, jumladan ChatGPT orqali sayohat marshrutlarini tuzish, mehmonxona tanlash va budjet hisoblash imkoniyatlaridan foydalanayotgani ta’kidlandi. Shuningdek, turistlar orasida gastronomik, ekologik va madaniy tajribaga asoslangan sayohatlarga qiziqish ortib borayotgani qayd etildi.

Anjumanda xalqaro hamkorlik yo‘nalishidagi ishlarga ham to‘xtalib o‘tildi. Xususan, AQShning Expedia Group, Ispaniyaning Amadeus hamda Xitoyning Trip.com bilan O‘zbekistonning turizm salohiyatini xalqaro miqyosda targ‘ib qilish bo‘yicha dastlabki kelishuvlarga erishilgani ma’lum qilindi.

Shuningdek, xorijiy turoperatorlar va OAV vakillari uchun info va press-turlar muntazam tashkil etilayotgani aytildi. Jumladan, Rossiya, Turkiya, Pokiston va qo‘shni davlatlardan turoperatorlar uchun maxsus info-turlar o‘tkazilgan. Buyuk Britaniya, AQSh, Avstraliya va Yangi Zelandiyaning nufuzli OAV vakillari ham O‘zbekistonga tashrif buyurgan.

Anjumanda xalqaro nashrlar tomonidan O‘zbekistonning turizm salohiyati yuksak baholanayotgani alohida ta’kidlandi. Jumladan, The Washington Post, The Telegraph hamda Condé Nast Traveler O‘zbekistonni 2026 yilning eng istiqbolli sayyohlik yo‘nalishlari qatoriga kiritgan.

Matbuot anjumanida qayd etilganidek, amalga oshirilayotgan keng ko‘lamli islohotlar natijasida joriy yilning o‘tgan 4 oyi davomida mamlakatimizga 4 million nafar xorijiy turist tashrif buyurgan bo‘lib, bu o‘tgan yilning mos davriga nisbatan 30 foiz o‘sishni tashkil etgan. Turizm xizmatlari eksporti hajmi esa 1,6 milliard dollarga yetgan.

Shuningdek, “O‘zbekiston bo‘ylab sayohat qil” dasturi doirasida mahalliy turistlarning hududlarga 6 million 844 ming safarlari tashkil etilgani ma’lum qilindi.

Anjuman yakunida jurnalistlarni qiziqtirgan savollarga javob berildi hamda turizm sohasini yanada rivojlantirish borasidagi ustuvor vazifalar belgilab olingani ta’kidlandi.