Toshkentdagi Islom sivilizatsiyasi markazi – sayyohlarni o’ziga jalb qiluvchi muhim maskan
2026-04-06 15:45:00 / Yangiliklar
Markazni tashkil etish g‘oyasini Prezident Shavkat Mirziyoyev 2017-yilda BMT Bosh Assambleyasining sessiyasida ilgari surgan edi. Markaz tarix, ilm-fan va zamonaviylikni o‘zida birlashtiruvchi makon sifatida loyihalashtirilgan.
Qariyb 8 yil davomida bunyod etilgan majmua o‘z ichiga muzey, kutubxona, ilmiy va ta’lim maydonlarini oladi. Asosiy ekspozitsiyalar orasida Usmon Mus’hafi joylashgan Qur’on zali, islomgacha bo‘lgan madaniyat, IX–XIII asrlardagi ilmiy yuksalish, Temuriylar davri hamda O‘zbekistonning zamonaviy taraqqiyotiga bag‘ishlangan bo‘limlar mavjud.
Markaz ilmiy xab vazifasini ham bajaradi: bu yerda xalqaro forumlar o‘tkaziladi, shuningdek, IRCICA, ICESCO va Oksford Islom tadqiqotlari markazi kabi tashkilotlar ishtirokida ekspertlar kengashi faoliyat yuritadi.
Kutubxona to‘plami 2 500 dan ortiq qo‘lyozma va toshbosma asarlardan, 40 000 ga yaqin bosma nashrlardan hamda 350 000 dan ziyod elektron shakldagi materiallardan iborat bo‘lib, hozirgacha mamlakatga 2000 ga yaqin noyob osori-atiqa qaytarib kelindi.
Xalqaro hamkorlik hamda noyob tarixiy boyliklarning qaytarilishi tufayli markaz O‘zbekistonning madaniy va ma’rifiy turizm yo‘nalishi sifatidagi jozibadorligini kuchaytirmoqda.
Islom sivilizatsiyasi markazi boy meros va innovatsiyalarni o‘zida mujassam etgan zamonaviy madaniy xab sifatida Toshkentning yangi qiyofasini shakllantirmoqda.