O‘zbekiston Respublikasi Turizm qo‘mitasi

Dastur doirasidagi BMT Turizm “Ipak yo‘lida turizm” tematik ofisining rasmiy ochilishi bo‘ldi. Samarqand shahrida joylashgan ushbu yangi ofis Ipak yo‘li hududida barqaror turizmni rivojlantirish, qo‘shma loyihalarni muvofiqlashtirish, transchegaraviy turistik yo‘nalishlarni rivojlantirish hamda mintaqaviy hamkorlikni mustahkamlash uchun muhim xalqaro platforma vazifasini bajaradi.

Ochilish marosimida so‘zga chiqqan BMT Turizm bosh kotibi ofis aynan Samarqandda tashkil etilganining ramziy ahamiyatini alohida ta’kidladi. Unga ko‘ra, ushbu shahar asrlar davomida tovarlar, g‘oyalar, madaniyat va ishonch kesishgan maskan bo‘lib kelgan. Bugungi kunda ham Samarqand mamlakatlar va xalqlarni bog‘lovchi muhim markazlardan biri sifatidagi o‘ziga xos rolini saqlab qolmoqda.

Shayxa Al Novays, shuningdek, Samarqandda tematik ofisni joylashtirish bo‘yicha O‘zbekiston tashabbusi tashkilotga a’zo davlatlar tomonidan qo‘llab-quvvatlanganini qayd etdi. Uning ta’kidlashicha, bu mamlakat rahbariyatining turizmni rivojlantirish, xalqaro hamkorlikni kengaytirish va O‘zbekistonning Ipak yo‘li hududidagi rolini mustahkamlashga qaratilgan strategik yondashuvi va izchil siyosati natijasidir.

Bosh kotib BMT Turizm tomonidan mazkur ofis faoliyati to‘liq qo‘llab-quvvatlanishini ham bildirdi.

Ofis bilan tanishuv davomida Shayxa Al Novays bino me’moriy qiyofasining tarixiyligini alohida e’tirof etib, interyerda namoyish etilgan san’at asarlari to‘plamini yuqori baholadi.

Dastur davomida BMT Turizm bosh kotibi Xalqaro turizm akademiyasi bitiruvchilariga sertifikatlar topshirish marosimida ham ishtirok etdi.

Bitiruvchilarga murojaat qilar ekan, Shayxa Al Novays ta’limning professional va shaxsiy rivojlanishdagi o‘rnini alohida ta’kidladi hamda arab maqolini keltirdi: “Ilm — bu nur”. Uning so‘zlariga ko‘ra, aynan bilim inson oldidagi imkoniyat va chaqiriqlarni aniqroq ko‘rishga hamda ishonch bilan oldinga harakat qilishga yordam beradi.

O‘z nutqida bosh kotib Samarqandning tarixan ilm-fan va madaniyat markazlaridan biri sifatidagi alohida o‘rnini ham qayd etib, ushbu shaharda bilim, ochiqlik va taraqqiyotga intilish ruhi bugungi kunda ham davom etayotganini ta’kidladi.

Shuningdek, nutqda O‘zbekiston Respublikasi Prezidenti tomonidan yoshlar va ta’lim sohasiga berilayotgan yuksak e’tibor alohida qayd etildi. Shayxa Al Novays davlat rahbari yosh avlodning katta qo‘llab-quvvatlovchisi ekanini va ta’lim mamlakat kelajagini belgilovchi strategik ustuvor yo‘nalishlardan biri ekanini ta’kidladi.