O‘zbekiston Respublikasi Turizm qo‘mitasi

Hozirgi kunlarda mamlakatimizning barcha hududlarida — shaharlardan tortib, chekka qishloq va ovullargacha — yangilanish va yasharish ramzi bo‘lgan, xalqaro miqyosda ham e’tirof etilgan Navro‘z bayrami keng nishonlanmoqda. Yurt bo‘ylab aholi bu ayyomni katta xursandchilik bilan qarshi olmoqda.

Joriy yilda bayram “Navro‘zni ulug‘lash — insonni ulug‘lashdir!” shiori ostida umumxalq sayillari ko‘rinishida o‘tkazilmoqda. Uning har bir mahalla va qishloqda keng nishonlanishi qadimiy an’analarimizni yanada mustahkamlab, yosh avlodni milliy qadriyatlarga sadoqat va umuminsoniy tamoyillarga hurmat ruhida tarbiyalashga xizmat qilmoqda.

O‘zbekistonning barcha viloyatlarida Navro‘z munosabati bilan o‘tkazilayotgan umumxalq sayillari bayramga alohida fayz bag‘ishlamoqda. Maydonlarda milliy taomlar tayyorlanib, hunarmandchilik ko‘rgazmalari, xalq o‘yinlari, kuy-qo‘shiqlar namoyish etilmoqda. Turli yoshdagi insonlar bir joyga jam bo‘lib, birdamlik va ahillikni namoyon etmoqda.

Hududlardagi bayram tadbirlari ko‘tarinki ruhda kechmoqda. Bolalar uchun maxsus tomoshalar, sport musobaqalari va madaniy chiqishlar tashkil etilgan bo‘lib, har bir ishtirokchida quvonch va baxt tuyg‘ularini uyg‘otmoqda. Navro‘zning fayzi bilan tabiat ham yangilanib, insonlar qalbiga iliqlik baxsh etmoqda.

Navro‘z nafaqat bayram, balki xalqimizning ma’naviy birligi, mehr-oqibat va bag‘rikenglik timsoli sifatida alohida ahamiyat kasb etadi. U jamiyatda tinchlik va totuvlikni mustahkamlashga xizmat qilib, ezgu orzu-umidlarimizni yanada yuksaltirmoqda.