O‘zbekiston Respublikasi Turizm qo‘mitasi

Sharq taomlari qadimdan o‘zining mazasi, xilma-xilligi va o‘ziga xos tayyorlash usullari bilan dunyoga mashhur. Festival doirasida mehmonlar nafaqat turli taomlardan bahramand bo‘lishlari, balki ularning qanday tayyorlanishini ham o‘z ko‘zlari bilan ko‘rish imkoniga ega bo‘ladilar.

Festivalning birinchi kuni Samarqand shahridagi Alisher Navoiy ko‘chasida xalqaro oshpazlar ishtirokida o‘tkaziladi. Turli mamlakatlardan kelgan oshpazlar o‘z milliy taomlarini tayyorlab, mehmonlarga taqdim etadilar.

Ikkinchi kuni esa shu hududda mahalliy oshpazlar ishtirokida “Taste of Samarkand” festivali tashkil etilib, unda Samarqand oshxonasi va o‘zbek milliy taomlarining eng yaxshi namunalarini ko‘rish mumkin bo‘ladi.

Festival davomida har kuni 100 dan ortiq oshpaz ishtirokida taom tayyorlash bo‘yicha musobaqalar bo‘lib o‘tadi. Shuningdek, 50 dan ortiq noyob taomlar tayyorlanishi namoyish etiladi. Mehmonlar uchun professional oshpazlar tomonidan mahorat darslari tashkil etilib, xorijiy mamlakatlar taomlarini tayyorlash jarayonlari ham ko‘rsatib beriladi.

Bundan tashqari, festivalda hunarmandchilik buyumlari va sharq shirinliklari ko‘rgazmalari, turli madaniy-ko‘ngilochar konsert dasturlari ham o‘tkaziladi. Ko‘rik-tanlovlarda ishtirok etgan oshpazlar uchun maxsus mukofotlar ham taqdim etilishi rejalashtirilgan.

“Sharq taomlari” festivali nafaqat gastronomiya ixlosmandlari, balki milliy madaniyat va an’analarga qiziquvchilar uchun ham unutilmas voqea bo‘lishi kutilmoqda.