O‘zbekiston Respublikasi Turizm qo‘mitasi

O‘zbekiston Respublikasi Turizm qo‘mitasi hamda Xorazm viloyati turizm boshqarmasi ushbu murojaatni ijobiy ko‘rib chiqib, viloyatdagi 40 dan ortiq turizm sohasi vakillari, turoperatorlar va gidlar uchun Qoraqalpog‘iston Respublikasi bo‘ylab ikki kunlik info-tur tashkil etdi.

Infotur ishtirokchilari Amudaryo tumanidagi “Chilpiq” qo‘rg‘oni arxeologiya majmuasiga tashrif buyurishdi. Mehmonlar bu tarixiy obyektning rivoji va uning arxeologik ahamiyati bilan chuqur tanishib, o‘zlarini qiziqtirgan savollarga mutaxassislardan javob oldilar.

Shundan so‘ng, Nukus shahridagi I.V. Savitskiy nomidagi Qoraqalpog‘iston davlat san’at muzeyiga tashrif amalga oshirildi. “Sahrodagi Luvr” nomi bilan mashhur muzeyda 90 mingdan ortiq eksponat saqlanadi. Infotur ishtirokchilari XX asr rus avangard san’ati asarlari, qoraqalpoq xalq qo‘l hunari va tarixiy buyumlar kolleksiyasi bilan tanishdilar.

Infotur davomida mehmonlar “Mizdaxkon” majmuasida ham bo‘lishdi. Bu yerda IV–XIV asrga mansub Markaziy Osiyodagi eng qadimiy va yirik arxeologik esdaliklar – Govur qal’a, Mazlumxan suluv, Shamun Nabi, Rejep Xalifa va Jomart qassob tarixiy obyektlari bilan tanishildi.

Shuningdek, Qoraqalpog‘iston tarixi va madaniyati davlat muzeyiga tashrif davomida muzeyda arxeologik topilmalar, qoraqalpoq ayollarining “saukele” bosh kiyimlari, qo‘lda to‘qilgan gilamlar eksponatlari namoyish etildi.

Nukus shahrida yangi ochilgan “Ramada by Wyndham” mehmonxonasida ishtirokchilar zamonaviy turistik infratuzilma hamda turistlar uchun yaratilgan qulayliklar bilan tanishdilar.

Xo‘jayli tumanidagi “Karavan” restoranida qoraqalpoq milliy taomlari ko‘rgazmasi va baliqdan tayyorlanadigan turli taomlar namoyishi bo‘lib o‘tdi. Shuningdek, milliy musiqa konserti tashkil qilindi.

Ikkinchi kunda ishtirokchilar Chimboy tumaniga tashrif buyurishdi. Chimboyda Adil Tajimuratovning zargar ustaxonasida tayyorlangan buyumlar namoyish etildi.

Taxtako‘pir tumanida infotur ishtirokchilari “Qorateran” ekoturizm majmuasi va “Tax-tepa” etno ovulida bo‘lib, bu hududdagi etno va eko turizm imkoniyatlari bilan tanishdilar hamda baliq taomlaridan bahramand bo‘ldilar.