“Silk Road Samarkand” hududida osma dor yo‘li qurilmoqda
2026-02-19 10:20:00 / Yangiliklar
"Silk Road Samarkand" turizm markazi hududi bo‘ylab zamonaviy osma dor yo‘lini tashkil etish bo‘yicha qurilish ishlari boshlandi. Mazkur loyiha hududning turistik jozibadorligini yanada oshirish hamda mehmonlar uchun qulay va zamonaviy transport infratuzilmasini yaratishga qaratilgan.
Loyihaga ko‘ra, osma dor yo‘lining umumiy uzunligi 1700 metrni tashkil etadi. Tizim 35 ta kabinadan iborat bo‘lib, har bir kabina 10 nafargacha yo‘lovchini tashish imkoniyatiga ega. Dor yo‘lining harakat tezligi 5 m/s bo‘lib, o‘tkazuvchanlik quvvati soatiga 1500 nafargacha yetadi.
Ushbu loyiha amalga oshirilishi natijasida hudud bo‘ylab harakatlanish qulaylashadi, sayyohlar uchun qo‘shimcha manzara va dam olish imkoniyatlari yaratiladi. Shuningdek, osma dor yo‘li turizm infratuzilmasini rivojlantirishga hamda hududga tashrif buyuruvchilar sonini ko‘paytirishga xizmat qiladi.