O‘zbekiston Respublikasi Turizm qo‘mitasi

Dastlab “Yangi Namangan shaharchasi” hududida saf tortgan avtoparad mototsikllar hamrohligida viloyat markazidagi asosiy ko‘chalar bo‘ylab harakatlandi va “Afsonalar vodiysi” temaktik parkida tantanali kutib olindi.

Bog‘ markazida tashkil etilgan sahna oldida festivalning ochilish marosimi bo‘lib o‘tdi. Namangan viloyati hokimi Shavkatjon Abdurazzoqov festival ishtirokchilari va mehmonlarini samimiy qutlab, turizm salohiyatini oshirish, yoshlarni kasb-hunarga qiziqtirish, bandligini taʼminlashda bu kabi tadbirlarning ahamiyati katta ekanligini eʼtirof etdi.

Ko‘rgazmaga nafaqat Namangan, mamlakatimizning turli hududlari, qo‘shni Tojikiston, Qirg‘iz Respublikalaridan ham o‘nlab noyob avtoulovlar kelgani festival nufuzini yanada oshirdi.

Xalqaro miqyosda tashkil etilgan ushbu festival ishtirokchi va mehmonlarda unutilmas taassurotlar qoldirdi. Tadbir doirasida noyob avtomobillar paradi, retro hamda tyuning avtomobillar ko‘rgazmasi, ehtiyot qismlar yarmarkasi, qimmatbaho sport avtomobillari namoyishi, shuningdek, turli tanlov va musobaqalar o‘tkazildi.

Festivalning tantanali yopilish marosimida festival davomida faol ishtirok etganlar, shuningdek, turli yo‘nalishlar bo‘yicha g‘olib va sovrindorlar munosib ravishda rag‘batlantirildi. Xususan, “Eng yaxshi retro avtomobil”, “Eng yaxshi ichki va tashqi tyuning”, “Eng yaxshi ovoz tyuningi”, “Eng yaxshi avtomobil dvigateli” kabi nominatsiyalar bo‘yicha g‘oliblar aniqlanib, taqdirlandi.

Taʼkidlash joiz, festivalda ijtimoiy tarmoqlardagi eng faol, auditoriyasi qariyb 1,5-3 million aʼzoni tashkil etuvchi kanallar asoschilari hamda mashhur avtoblogerlar ham faol ishtirok etdi.