O‘zbekiston Respublikаsi Din ishlаri bo‘yichа qo‘mitаsi

Mamlakatimizda so‘nggi yillarda barcha sohalar qatori diniy-ma’rifiy yo‘nalishda ham keng ko‘lamli va salmoqli ishlar amalga oshirilmoqda.

Xususan, davlatimiz Rahbarining tashabbuslari bilan Haj safarini yuqori saviyada va tartibli tashkil etish bo‘yicha tizimli chora-tadbirlar ko‘rildi, tashkiliy va xizmat ko‘rsatish yo‘nalishidagi ishlar tubdan takomillashtirilib, mutlaqo yangi bosqichga olib chiqildi.

Yangi O‘zbekistonda amalga oshirilayotgan islohotlarning samarasi o‘laroq haj safariga boruvchi fuqarolarimiz soni bosqichma-bosqich oshirib borilmoqda. Xususan, 2018-yilga nisbatan 2025-yildagi kvota 3 baravarga ko‘paydi, ya’ni, 5 000 nafardan 15 000 nafarga yetdi.
Ushbu ishlarni mutlaqo yangi sifat bosqichiga olib chiqish maqsadida Prezidentimizning Farmonlariga muvofiq “Haj va Umra yagona portali” ishlab chiqilib, ishga tushirildi.

Unga ko‘ra, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, MFYlar bilan hamkorlikda navbatda turgan fuqarolar ma’lumoti xatlovdan o‘tkazilib, “Haj va Umra yagona portali” tizimiga kiritildi.

Portalni yaratishdan maqsad:
– hajga boruvchilarga qulaylik yaratish, navbatni tartibga solish va navbat shakllanishida inson omilini bartaraf etish;
– “Haj” safariga boruvchi fuqarolarning yagona elektron navbatini shakllantirish va ariza berishni elektron shaklga o‘tkazish;
– hajga doir ma’lumotlarni yig‘ish va rasmiylashtirish bilan bog‘liq jarayonlarni raqamlashtirish.

Mazkur Portal vazirlik va idoralarning 15 dan ortiq axborot tizimlari bilan integratsiya qilingan bo‘lib, buning natijasida fuqarolarga bir qancha qulayliklar yaratiladi.
Talabgor fuqaro 2 xil usulda ya’ni Yagona interaktiv davlat xizmatlari portali www.my.gov.uz va haj-umra.gov.uz sayti orqali elektron navbatga yozilishi mumkin.

Buning uchun, davlat xizmatlari portali orqali yoki elektron raqamli imzodan foydalangan holda yoxud “Mobil-ID” tizimida identifikatsiyadan o‘tish orqali so‘rovnoma yuborishi mumkin.

So‘rovnomani to‘ldirishda, fuqaroga qulaylik va yengillik yaratish maqsadida faqatgina Jismoniy shaxsning shaxsiy identifikatsiya raqami va telefon raqamni kiritishning o‘zi yetarli. Boshqa barcha kerakli ma’lumotlar tizimdan avtomatik ravishda olinadi.

Talabgor navbatga yozilganidan so‘ng unga avtomatik ravishda  SMS xabarnoma yuboriladi.

Ushbu Portalning ishga tushirilishi orqali quyidagi imkoniyat va qulayliklar yaratiladi:
Aholimiz uydan chiqmasdan, onlayn tarzda 24/7 rejimida navbatga yozilishi mumkin bo‘ladi; hajga navbatga yozilish uchun tashkilotlarga borish, hujjat yig‘ish, qog‘ozbozlik kabi byurokratik jarayonlar tugatiladi; Navbatga olish bo‘yicha mahallalarda qo‘lda yuritiladigan kitoblarning yo‘qolishi oqibatida fuqarolar o‘rtasida yuzaga kelayotgan tushunmovchilik va nizolarga barham beriladi.

Portalning ishlash jarayoni yoki haj uchun navbatga yozilish bilan bog‘liq savollarga tezkor javob berish maqsadida Respublika tezkor shtabi hamda hududlarda ishchi guruhlari faoliyati yo‘lga qo‘yilib, “koll markaz” tashkil etildi.

“Koll markaz”ga 77 882-18-58 yoki 99 882-18-58 telefon raqamlari orqali savollaringizga javob olishingiz mumkin.

Yagona portal orqali onlayn ro‘yxatdan o‘tish imkoniyatining paydo bo‘lgani – yurtdoshlarimiz orasida katta qiziqish uyg‘otishi tabiiy hol. Shu sababli, barchani tizimdan oqilona va mas’uliyat bilan foydalanishga chaqiramiz.

Amaldagi tartibga muvofiq, Haj safarini bir marta amalga oshirish joriy etilgan. Bu qoida imkoniyatlarni barchaga teng taqsimlash maqsadida tatbiq etilganini ma’lum qilamiz.

Albatta, “Haj va Umra yagona portali”ning ishga tushirilishini, qulaylik va yengillik jihatidan, barchani birdek mamnun etadigan, sohaga doir navbatdagi muvaffaqiyatli qadam sifatida e’tirof etish mumkin!

Video shaklida ko'rish uchun havola: https://youtu.be/gopVNaotJKM?si=8_6G6FI-uiVTQFGO