O‘zbekiston Respublikаsi Din ishlаri bo‘yichа qo‘mitаsi

 
O‘zbekistondagi Islom sivilizatsiyasi markazida o‘tkazilayotgan «Islom sivilizatsiyasi: tinchlik, bag‘rikenglik va ilm-ma’rifat yo‘li» mavzusidagi I Xalqaro islom sivilizatsiyasi forumi doirasida O‘zbekiston Respublikasi Prezidenti Administratsiyasining Diniy-ma’rifiy masalalar bo‘yicha departamenti boshlig‘i Muzaffar Kamilov, O‘zbekiston Respublikasi Din ishlari bo‘yicha qo‘mitasi raisi Sodiq Toshboyev hamda Ozarbayjon Respublikasi Diniy tashkilotlar bilan ishlash davlat qo‘mitasi raisi Ramin Mamedov o‘rtasida samimiy va mazmunli muloqot bo‘lib o‘tdi.
 

Uchrashuvda O‘zbekiston Respublikasi Prezidenti Shavkat Mirziyoyev rahbarligida diniy-ma’rifiy sohada amalga oshirilayotgan keng qamrovli islohotlar mamlakatning barqaror taraqqiyoti va xalqaro nufuzini yuksaltirishga xizmat qilayotgani alohida ta’kidlandi.
Shuningdek, davlat rahbarining uzoqni ko‘zlab, puxta o‘ylangan qarorlar qabul qiluvchi, islohotlarni izchil amalga oshirayotgan yetakchi sifatidagi faoliyati yuqori baholandi.

Muloqot davomida O‘zbekiston va Ozarbayjon o‘rtasidagi diniy-ma’rifiy hamda ilmiy-ta’lim sohalaridagi hamkorlikni yanada kengaytirish masalalari yuzasidan atroflicha fikr almashildi.
 

Xususan, O‘zbekiston xalqaro islomshunoslik akademiyasi hamda Ozarbayjonning oliy ta’lim muassasalari o‘rtasida professor-o‘qituvchilar va talabalarning akademik almashinuvini tizimli yo‘lga qo‘yish, mazkur yo‘nalishda ikki tomonlama maxsus grant dasturlarini joriy etish, Akademiya bazasida islom moliyasi sohasi uchun yuqori malakali mutaxassislar tayyorlashga qaratilgan maxsus modul kurslarini tashkil etish hamda bu jarayonga ozarbayjonlik mutaxassislarni jalb qilish bo‘yicha takliflar muhokama qilindi.

Shuningdek, diniy-ma’rifiy hamkorlikni chuqurlashtirish, ziyorat turizmi yo‘nalishida qo‘shma loyihalarni amalga oshirish va ikki mamlakat o‘rtasidagi amaliy aloqalarni yangi bosqichga olib chiqish yuzasidan o‘zaro kelishuvlarga erishildi.

Din ishlari boʻyicha qoʻmita
Axborot xizmati