Qashqadaryo viloyati hоkimligi

Nyu-York shahrida bo‘lib o‘tgan BMT Bosh Assambleyasining 80-sessiyasida O‘zbekiston Respublikasi Prezidenti Shavkat Mirziyoyev tomonidan ilgari surilgan tashabbuslar nafaqat mamlakatimiz manfaatlarini, balki butun insoniyat taqdiriga daxldor masalalarni qamrab olgani bilan alohida ahamiyatga egadir. Bu chiqish O‘zbekistonning xalqaro maydondagi nufuzi ortib borayotganini, davlatimiz o‘z so‘zi va takliflari bilan jahon hamjamiyati uchun ishonchli hamkor sifatida namoyon bo‘layotganini tasdiqlaydi.

Prezident Shavkat Mirziyoyev BMTning Xavfsizlik Kengashini zamon talablariga mos ravishda kengaytirish va uning faoliyatida rivojlanayotgan davlatlar manfaatlarini to‘liq aks ettirish zarurligini ta’kidladi. Bu taklif ko‘p qutbli dunyoda adolat va teng huquqlilik prinsiplarini mustahkamlashga qaratilgan dolzarb tashabbus sifatida e’tirof etilmoqda. O‘zbekistonning bu boradagi pozitsiyasi jahonda barqarorlik va xavfsizlikni ta’minlash uchun muhim hissa qo‘shadi.

Ma’ruzada Yangi O‘zbekiston islohotlari natijasida iqtisodiyotni diversifikatsiya qilish, kambag‘allikni qisqartirish va aholi farovonligini oshirish borasida erishilgan yutuqlar alohida qayd etildi. Shu bilan birga, ta’lim va sog‘liqni saqlash sohalarida xalqaro hamkorlikni kuchaytirish, jumladan, Toshkentda Butunjahon professional ta’lim sammitini o‘tkazish va BMT qarorgohida bolalar onkologiyasiga bag‘ishlangan sammit tashkil etish takliflari butun insoniyat kelajagiga qaratilgan amaliy qadamlardir.

Ta’kidlash joizki, Markaziy Osiyodagi barqarorlik O‘zbekiston tashqi siyosatining muhim ustuvor yo‘nalishidir. Prezidentimiz Afg‘onistondagi vaziyat yuzasidan muloqot va inklyuziv siyosat tarafdori ekanini bildirdi. Shuningdek, suv resurslarini boshqarish, demografik barqarorlik va qo‘shma iqtisodiy dasturlarni amalga oshirish orqali mintaqaviy hamkorlikni chuqurlashtirish takliflari mintaqada tinchlik va hamkorlik muhitini mustahkamlaydi.

Shu bilan birga, Orol fojiasi va suv inqirozi masalalari Prezident nutqida asosiy o‘rinni egalladi. O‘zbekistonning “Suvni tejash bo‘yicha Butunjahon forumi”ni o‘tkazish, suv xavfsizligiga oid “yo‘l xaritasi”ni ishlab chiqish, iqlim migratsiyasi bo‘yicha umumjahon kelishuvini qabul qilish tashabbuslari insoniyatning umumiy kelajagiga qaratilgan dolzarb takliflar sifatida jahon hamjamiyati e’tiborini qozondi.

Shuningdek, raqamli inqilob tez sur’atlarda kechayotgan bir sharoitda, O‘zbekiston rahbarining sun’iy intellekt sohasidagi bilim va yechimlarni beg‘araz almashish mexanizmlarini yaratish tashabbusi texnologiyalardan insonparvar maqsadlarda foydalanishga xizmat qiladi. Bu – raqamli taraqqiyotning milliy chegaralardan tashqarida ham umuminsoniy manfaatlarga xizmat qilishi lozimligini anglatadi.

Bundan tashqari, Prezidentimiz o‘z ma’ruzasida “Jahon yoshlarining tinchlik sari harakati” tashabbusini va uning qarorgohini O‘zbekistonda joylashtirish taklifini ilgari surdi. Qolaversa, Osiyo xotin-qizlar forumini doimiy xalqaro platformaga aylantirish g‘oyasi tinchlikparvar, ma’rifatli va barqaror taraqqiyotga intiluvchi avlodni shakllantirishga xizmat qiladi.

Bir so‘z bilan aytganda, BMT Bosh Assambleyasining 80-sessiyasida ilgari surilgan tashabbuslar O‘zbekistonning xalqaro maydondagi nufuzini mustahkamlash, global muloqotni kuchaytirish va umuminsoniy masalalar yechimini topish yo‘lidagi faol sa’y-harakatlarini yaqqol namoyon etdi. Mamlakatimiz tinchlik, taraqqiyot va hamkorlik tashabbuskori sifatida dunyo siyosatida o‘z o‘rnini tobora mustahkamlab bormoqda.

Davron KESIMOV,
Demokratik jarayonlarni tahlil qilish markazi Qashqadaryo viloyati hududiy bo‘linmasi rahbari, Xalq deputatlari viloyat Kengashi deputati.