Qashqadaryo viloyati hоkimligi

Assalomu alaykum, aziz o‘qituvchi va murabbiylar, qadrli ustozlar!

Avvalambor, Siz azizlarni, ta’lim sohasida mehnat qilayotgan barcha ustozlarni, yaqinlashib kelayotgan umumxalq bayrami – O‘qituvchi va murabbiylar kuni bilan samimiy tabriklayman!

Inson qaysi kasbni egallamasin, hayotda qanday ulug‘ martabaga, ulkan yutuqlarga erishmasin, o‘ziga ta’lim-tarbiya bergan muallimlarini hech qachon unutmaydi, ularning oldida o‘zini hamisha qarzdor deb his qiladi.

Bilamiz, azaldan “Ustoz otangday ulug‘” degan hikmatni qalbiga singdirgan xalqimizning bu soha vakillariga mehr va ehtiromi boshqacha.

Yangi O‘zbekistonni bunyod etish, Uchinchi Renessansni yaratish orzusi bilan yashayotgan ekanmiz, bu ezgu maqsadlarimiz kaliti faqat ta’lim-tarbiyada ekanligini barchamiz yaxshi anglaymiz.

Muhtaram Prezidentimiz ta’kidlaganidek: iqtisodiyot rivojlanishi, yurtimiz va farzandlarimiz kelajagi faqat va faqat ta’lim va muallimga bog‘liq.

Keyingi yillarda mamlakatimizda o‘qituvchi qadrini ulug‘lash, nufuzini ko‘tarishga alohida e’tibor qaratilmoqda.

Hozir maktablardagi 1 ming 300 nafar o‘qituvchi  8-10 mln so‘m, 1 025 nafari 10 mlndan ortiq oylik olyapti (oxirgi 2 yilda yuqori maosh olayotgan o‘qituvchilar soni qariyb 6 baravarga oshdi).

Maktab direktori, uning o‘rinbosarlari oyligi bu yilni o‘zida 30 %ga oshdi.

Toifa sinovlaridan 86 va undan yuqori ball olgan 460 nafar o‘qituvchi 70% ustama olyapti.

Olis hududdagi 123 ta maktabga 982 nafar malakali o‘qituvchilar  ishlab, ish stajiga qarab 10 %dan 50 %gacha ustama olyapti.

Bu o‘quv yilidan yangi baholash tizimi joriy qilingan maktablar 188 taga yetkazildi.

Yangi baholash joriy qilingan 22 ta maktab jamoasi 30 foizgacha ustama olyapti.

Muhtaram Prezidentimizning qo‘llab-quvvatlashlari, yaratgan imkoniyatlari natijasida viloyatimizda oxirgi ikki yilda bog‘cha, maktab o‘rni 3 baravarga oshdi.

Bog‘chalar soni qariyb 4,5 mingtaga, qamrov 70 %ga yetdi (2017-yilda 326 ta bog‘cha, qamrov 13%). 

Shu yilning o‘zida 22 ming o‘rinli 502 ta bog‘cha ochildi (496 tasi xususiy va oilaviy).

Yangi o‘quv yili oldi 21 ta xususiy maktab ochildi (loyiha qiymati 150 mlrd so‘m, 5 ming o‘quvchi o‘rni, 600 ta yangi o‘rni).

Natijada, xususiy maktab soni 53 taga yetib, 10 mingdan ortiq o‘quvchi qamrab olindi (2024-yil boshida 16 ta).

Maktablar moddiy-texnika bazasini yaxshilash, ularni zamonaviy ko‘rinishga keltirish bo‘yicha qator ishlar amalga oshirilmoqda.

Xususan, so‘nggi 8 yilda 600 dan ortiq maktabdagi yangi qurilish, rekonstruksiya hisobidan 150 mingdan oshiq o‘quvchi o‘rni yaratildi.

Oxirgi 2 yilda 2 koeffitsiyentli maktablar soni 125 tadan 61 taga kamaydi.

655 ta maktabning mebel, parta, doskalari yangilandi, 906 ta maktabga kompyuter sinflari olib berildi.

Bu o‘quv yilida “Zo‘r!” (“Klass!”) loyihasi doirasida Rossiyadan 21 nafar, ingliz tili fani bo‘yicha xorijdan 36 nafar o‘qituvchi olib kelinyapti (hozircha 21 tasi viloyatga keldi).

Joriy yilda 95 nafar (har bir tumandagi davlat maktabidan 5 nafar, xususiydan 15 nafar) o‘qituvchi xorijga malaka oshirishga yuborilmoqda.

Ta’lim sifatiga berilayotgan e’tibor natijasida, maktab bitiruvchilarining 48 foizi oliygohlarga o‘qishga kirdi, oliy ta’limga kirish ko‘rsatkichi o‘tgan yilga nisbatan 8 foizga oshdi.

Vohamizdagi 53 ta texnikumlarda faoliyat ko‘rsatayotgan 2 ming 600 nafar pedagog o‘z ishini zamonaviy talablar asosida tashkil etib, 50 mingdan ortiq yoshlarga zamonaviy kasb-hunar sirlarini o‘rgatib kelmoqda.

2024/2025-o‘quv yilidan Germaniyaning Avestos kompaniyasi bilan hamkorlikda Shahrisabz shahri va G‘uzordagi bittadan texnikumda nemis standarti asosida kasbga o‘qitish yo‘lga qo‘ygan edik.

Xalqaro dastur samara bergani sababli, loyiha qo‘shimcha 4 texnikumda kengaytirildi

O‘tgan yili 8 nafar, bu yil esa 27 nafar texnikum o‘qituvchilari Germaniyada malaka oshirdi.

Yaqin-yaqingacha vohamizda bitta universitet, bitta institut, bitta universitet filiali faoliyat yuritgan bo‘lsa, bugungi kunda vohamizdagi oliy o‘quv yurtlarining soni 9 taga yetdi, o‘qiyotgan talabalar soni 100 mingdan oshdi.

Qadrli o‘qituvchi va murabbiylar!

Viloyatda ta’lim-tarbiya borasidagi yo‘limiz, maqsadimiz aniq.

Ta’limning barcha bo‘g‘inida yoshlarga zamonaviy bilim berish, qulay muhit yaratish, o‘qituvchilarni har tomonlama rag‘batlantirish - eng ustuvor vazifalarimizdan biri bo‘lib qoladi.

Muhtaram Prezidentimiz ta’birlari bilan aytganda: odamlarimiz yaxshi yashashi uchun iqtisodiyotimiz kuchli bo‘lishi kerak! Buning uchun yangi tovar, yangi xizmat, yangi texnologiya kerak! Sifatli ta’lim tizimi orqaligina bularga erisha olamiz.

Agar, barchamiz, bog‘cha, maktab, texnikum, oliygohlar rahbarlari, ustoz-murabbiylar birgalikda harakat qilsak, albatta, oldimizga qo‘ygan katta marralarimizga yetamiz.

Barchangizni kasb bayramingiz bilan yana bir bor tabriklab, sihat-salomatlik, oilangizga fayzu baraka ezgu ishlaringizda muvaffaqiyatlar tilayman!

Hamisha shogirdlaringiz kamolini ko‘rib yashang!

El-yurt oldidagi ulug‘vor martabangiz hamisha baland bo‘lsin!

Bayramingiz muborak bo‘lsin!