Qashqadaryo viloyati hоkimligi

Bugun viloyat hokimi Murotjon Azimov Shahrisabz shahrining transport va yo‘l-transport infratuzilmasini rivojlantirish bosh rejasi taqdimoti bilan tanishdi.

Taqdimotda shaharda jamoat transporti tizimini takomillashtirish, samarali yo‘nalishlar tarmog‘ini shakllantirish, transport vositalarini yangilash hamda yo‘l harakati xavfsizligini ta’minlash bo‘yicha takliflar ilgari surildi.

Shuningdek, yangi avtobus yo‘nalishlarini joriy etish, bekatlar sonini ko‘paytirish hamda chorrahalardagi harakatni zamonaviy boshqaruv tizimlari asosida tashkil etish masalalariga e’tibor qaratildi.

Taqdimotda Shahrisabz shahrida 6 ta yangi jamoat transporti yo‘nalishini yo‘lga qo‘yish taklif etildi. Ularning umumiy uzunligi 84,49 kilometr bo‘lib, mavjud 90 ta bekatdan tashqari yana 186 ta bekatga ehtiyoj mavjudligi qayd etildi.

Chorrahalardagi transport oqimini tartibga solish bo‘yicha ham aniq takliflar ishlab chiqilgan. Jumladan, svetofor fazalarini optimallashtirish, ayrim chorrahalarni qayta tashkil etish va yo‘l infratuzilmasini takomillashtirish orqali tirbandliklarni kamaytirish ko‘zda tutilgan.

Taqdimot yakunida viloyat hokimi tomonidan shaharning transport va yo‘l-transport infratuzilmasini rivojlantirish bo‘yicha belgilangan vazifalarni sifatli va o‘z vaqtida amalga oshirish, takliflarni chuqur o‘rganish hamda tegishli ishlarni jadallashtirish yuzasidan mas’ullarga topshiriqlar berildi.