Qashqadaryo viloyati hоkimligi

Bugun Qashqadaryo viloyati hokimligida O‘zbekiston Respublikasi Prezidentining “Madaniyat, san’at va adabiyot sohalari xodimlaridan bir guruhini mukofotlash to‘g‘risida”gi Farmoni ijrosiga bag‘ishlangan tantanali taqdirlash marosimi bo‘lib o‘tdi.

Unda viloyat faollari, davlat va jamoat tashkilotlari vakillari, nuroniylar, ijodkorlar, yoshlar hamda ommaviy axborot vositalari xodimlari ishtirok etdi.

Ta’kidlanganidek, Yangi O‘zbekistonda madaniyat, san’at va adabiyot sohasi vakillarining fidokorona mehnati munosib qadrlanib, milliy ma’naviyatni yuksaltirish, boy madaniy merosimizni asrab-avaylash, uni kelgusi avlodlarga yetkazish yo‘lidagi xizmatlariga yuksak baho berilmoqda.

Prezidentimiz Farmoniga muvofiq davlatimizning yuksak mukofotlari bilan taqdirlanganlar orasida Qashqadaryo viloyatining bir qator munosib vakillari ham borligi voha ahli uchun alohida faxr tuyg‘usini bag‘ishladi.

Marosimda Qashqadaryo viloyati hokimi Murotjon Azimov mukofot sohiblarini samimiy tabriklab, Prezidentimiz nomidan orden va medallarni tantanali ravishda topshirdi.

Viloyat rahbari o‘z so‘zida mamlakatimizda inson qadrini ulug‘lash, ijod ahlini qo‘llab-quvvatlash va ularning jamiyat taraqqiyotidagi o‘rnini mustahkamlash davlat siyosatining muhim yo‘nalishlaridan biri ekanini ta’kidladi.

Mukofot sohiblari esa ko‘rsatilayotgan yuksak e’tibor va e’tirof uchun davlatimiz rahbariga minnatdorlik bildirib, bu ishonch ularni yanada samarali mehnat qilishga undashini qayd etdilar.

MUKOFOTLANGANLAR:
“Do‘stlik” ordeni bilan:
Aliqulov Muradilla Ximmatovich - Nishon tumani madaniyat bo‘limining baxshichilik to‘garagi rahbari, baxshi;
Komilov Ostanaqul Odilovich - Qashqadaryo viloyati ko‘zi ojizlar kutubxonasi direktori;
Nosirova Bo‘ritosh - O‘zbekiston Yozuvchilar uyushmasi a’zosi, publitsist;
Ergashova Moxira Turopovna - Kasbi tumani madaniyat bo‘limining «Kulol shodasi» folklor-etnografik xalq ansambli badiiy rahbari;
“Shuhrat” medali bilan:
Mamadiyev Boxodir Bobojonovich - Qashqadaryo viloyati tarixi va madaniyati davlat muzeyi direktori;
Odilova Gulnora Qilichevna - Respublika «Hunarmand» uyushmasi a’zosi, kashtachi;
Yusupov Ilxomiddin Sharofidinovich - Madaniy meros obyektlari restavratsiyasi direksiyasining Shahrisabz mintaqaviy restavratsiya markazi direktori.
Shuningdek, 2 nafar marhum san’atkorlarimiz:
Qashqadaryomizda tug‘ilib o‘sgan, o‘zining shirali va sehrli ovozi bilan o‘zbek maqom san’atini butun dunyoga tanitgan insonlardan biri, marhum O‘zbekiston Xalq xofizi O‘lmas Saidjonov ham “Mehnat shuhrati” ordeni bilan, Qashqadaryoda ijod qilib, birinchilardan estrada san’atini yurtimizga olib kirgan va o‘zining betakror ovozi va qo‘shiqlari orqali xalqimiz ko‘nglidan o‘chmas iz qoldirgan marhum estrada xonandasi Davron G‘oipov “Do‘stlik” ordeni bilan taqdirlandilar.