Yoshlar bandligini ta'minlashdagi "Koson tajribasi" vohamiz bo'ylab ommalashtiriladi
2026-05-14 20:25:00 / Yangiliklar
Xabar berganimizdek, payshanba - yoshlar kuni munosabati bilan bugun viloyat hokimi, tuman (shahar) hokimlari va boshqa mas’ul rahbarlar Koson tumanida bo‘lib, u yerda bir qator tadbirlarda ishtirok etdi.
Xususan, dastlab rahbarlar “Obod” mahallasida yoshlar bandligini ta’minlash va ularning tadbirkorlik tashabbuslarini qo‘llab-quvvatlash yuzasidan amaliy seminarda ishtirok etdi. U yerda 16 nafar yoshlarning o‘z xonadonida baliqchilik faoliyatini yo‘lga qo‘ygani va aholi tomorqalaridan unumli foydalanayotgani ishtirokchilarda katta qiziqish uyg‘otdi. Viloyat hokimi hovuzlarda baliq parvarishlayotgan yoshlar bilan suhbat qildi. Jarayonlar davomida tuman hokimi va viloyat Yoshlar ishlari boshqarmasi tomonidan amalga oshirilayotgan ishlar yuzasidan ma’lumotlar berildi. Ahamiyatlisi, viloyat hokimi mahalladagi mehnatsevar, dehqon va pillakor oila tomorqasiga tashrif buyurib, ularga sanatoriya uchun bepul yo‘llanma taqdim etdi.
Amaliy seminar ishtirokchilarining keyingi manzili "Tinchlik" mahallasi bo‘lib, u yerda mahalliy byudjet hisobidan ajratilgan 3 mlrd. so‘m mablag‘ evaziga qurilish-ta’mirlash ishlari olib borilishi natijasida barcha qulayliklarga va zamonaviy ko‘rinishga keltirilgan oilaviy poliklinika binosining ochilish marosimida ishtirok etdi. Ajablanarlisi shundaki, mazkur poliklinika hovlisida uzoqdan kelib ishlaydigan shifokorlar uchun barcha sharoitlar yaratilgan 2 ta xizmat uylari ham bunyod etilgan.
Shuningdek, seminar tumandagi “Maydayobu” mahallasida davom etib, bu yerda PQ–153-sonli qaror asosida zaxiradagi 55 gektar yer maydoni 55 nafar yoshlarga ajratib berilgani, chorvachilikka ixtisoslashgan ushbu mahallada yoshlar ajratilgan yerlardan unumli foydalanib, dastlab quyosh panellari o‘rnatgani, quduqlardan suv chiqarish orqali yerlarni yomg‘irlatib sug‘orish imkoniyatini yaratgani va shundan so‘ng chorva uchun ozuqa bazasini shakllantirish maqsadida beda ekib, bosqichma-bosqich chorvachilik faoliyatini keng yo‘lga qo‘ygani barcha seminar qatnashchilari uchun juda foydali bo‘ldi.