Qashqadaryo viloyati hokimi “Madaniyat va san’at fidokori” ko‘krak nishoni bilan taqdirlandi
2026-04-17 12:10:00 / Yangiliklar
Ushbu ko‘krak nishoni nizomiga ko‘ra, mamlakatimizda madaniyat va san’at sohasini rivojlantirish, o‘zbek milliy madaniyati va san’ati nufuzini jahon miqyosida oshirish, yosh iste’dod egalarining qobiliyati va salohiyatini ro‘yobga chiqarish borasida fidokorona mehnat qilgan va yuqori natijalarga erishgan shaxslar taqdirlanadi.
Ma’lumot uchun, 2025-yilda Ko‘kdala tumanida madaniyat markazi hamda bolalar musiqa san’at maktabi zamonaviy talablarga mos tarzda yangidan qurilib, foydalanishga topshirildi.
Viloyat musiqali drama va qo‘g‘irchoq teatrlari xorijiy davlatlarda o‘tkazilgan Xalqaro teatrlar festivallarida munosib ishtirok etib, g‘oliblikni qo‘lga kiritishdi.
Shahrisabz shahar 2-son bolalar musiqa va san’at maktabi hamda Koreya Respublikasining Iksan shahri madaniyat markazi o‘rtasida Hamkorlik memorandumi imzolandi. Joriy yil davomida viloyat badiiy jamoasining qator davlatlarga gastrol safari tashkil etiladi.
Viloyat hokimi Murotjon Azimovga ko‘krak nishonini O‘zbekiston Respublikasi madaniyat vazirining birinchi o‘rinbosari Bahodir Ahmedov topshirdi.