Qashqadaryo viloyati hоkimligi

Assalomu alaykum, qadrli onaxonlar, muhtarama opa-singillar!

Barchangizni ko‘klamning go‘zal bayrami – Xalqaro xotin-qizlar kuni bilan tabriklayman! Bahor osmoniday tiniq niyatlaringiz ijobat bo‘lib, doimo e’zoz va ehtiromda yashashingizni tilayman!

8-mart munosabati bilan mamlakatimiz bo‘ylab “Ayol baxtli bo‘lsa, jamiyat baxtlidir!” shiori ostida “Ayollarni e’zozlash” oyligi o‘tkazilmoqda.

Xotin-qizlarning ijtimoiy-iqtisodiy, ma’naviy salohiyatini yuksaltirish, ularni har tomonlama qo‘llab-quvvatlashga oid keng qamrovli chora-tadbirlar amalga oshirilmoqda.

Yurtimizda barcha islohotlar, avvalo, oila institutini mustahkamlash, ayollarning ijtimoiy himoyasini kuchaytirish, bandligini ta’minlash hamda munosib turmush sharoitini yaratishga qaratilmoqda

 “Ayollarga ilm berish — jamiyatni ilmli, ma’rifatli va salohiyatli qilish” degan mezon hayotimizga chuqur singib bormoqda.

Oxirgi 3 yilda 8 mingdan ortiq xotin-qizlarning oliygohlarda o‘qishi uchun 25 milliard so‘mlik kontrakt pullari to‘lab berildi.

Qariyb 32 ming nafariga 335 milliard so‘m foizsiz ta’lim kreditlari ajratildi.

Yaratilgan keng imkoniyat va sharoitlar hisobiga ayol tadbirkorlarimiz soni 2 baravarga oshdi.

90 mingga yaqin xotin-qizlar tadbirkorligini qo‘llab-quvvatlashga 2 trillion so‘mdan ortiq kredit ajratildi.

Barcha sohalarda zamonaviy bilim, iste’dod, yetakchilik qobiliyatiga ega fidoyi xotin-qizlarimiz soni yil sayin ortib bormoqda.

Bayram munosabati bilan viloyatimizdan mehnat faoliyatida katta natijalarga erishgan, el-yurtimiz o‘rtasida hurmat va e’tibor topgan muhtarama ayollarimizdan bir guruhi Davlatimizning yuksak mukofotlari bilan taqdirlandi.

Shuningdek, bilimi, iqtidori bilan tengdoshlariga namuna bo‘lib kelayotgan 2 nafar qizlarimiz Zulfiya nomidagi davlat mukofotiga sazovor bo‘ldi. Mukofotlanganlarni chin yurakdan tabriklab, kelgusi ishlarida ulkan yutuq va omadlar tilayman.

Qadrli tadbir ishtirokchilari!

Joriy yilda ham xotin-qizlarimizni faol qo‘llab-quvvatlash ustuvor vazifamiz bo‘lib qoladi.

Qizlarimizning ta’lim olishi bo‘yicha olib borayotgan ishlarimiz izchil davom ettiriladi.

Ayollarni ishli va daromadli qilish masalasi doimiy e’tiborimiz markazida bo‘ladi.

Xususan, 20 ming xotin-qiz kasb-hunar va tadbirkorlikka o‘qitiladi, 120 ming nafarining bandligi ta’minlanadi.

Tadbirkorlik qilmoqchi bo‘lgan ayollarimizga zaruriy moliyaviy resurslar yo‘naltiriladi, barcha rahbarlar bu borada ko‘makchi bo‘ladi.

Mahallalarda “Xotin-qizlar bandligini ta’minlash va salomatligini mustahkamlash markazlari” tashkil etiladi.

Ayollarni asrash, salomatligini muhofaza qilish, qizlarimizni erta nikoh va erta tug‘uruq kabi salbiy illatlardan himoya qilish, oila va nikoh muqaddasligini saqlash borasida keng jamoatchilik safarbar etiladi.

Har tomonlama sog‘lom, bilimli avlod tarbiyalash maqsadida “Ma’rifatli onalar maktabi” yo‘lga qo‘yiladi.

Ayollarning sportga qamrovini oshirish maqsadida “Sport olimpiada”lari tashkil etiladi.

Aziz bayram ishtirokchilari!

Bugun mamlakatimizda jamiyatimiz gultoji, millat tarbiyachisi bo‘lgan ayollarning huquq, manfaatlariga alohida e’tibor qaratilmoqda

Muhtaram Prezidentimiz ta’kidlaganlaridek: “Biz sizlarning timsolingizda Uchinchi Renessans bunyodkori bo‘lib, maydonga chiqayotgan 22 million yosh avlodni onalik mehri bilan tarbiyalab, voyaga yetkazgan buyuk bir kuchni ko‘ramiz. Sizlar tadbirkor, olim, muallim, shifokor, muhandis, davlat va jamoat arbobi, bir so‘z bilan aytganda, xonadonlarimiz farishtasi, oila va jamiyat tayanchi, desak, ayni haqiqatni aytgan bo‘lamiz”.

Biz Sizlar bilan hamisha faxrlanamiz! Sizga quvonch, mehr tortiq etishdan ruhlanamiz.

Sizlarni rozi va baxtli qilish, ezgu orzu-niyatlaringizni ro‘yobga chiqarish yo‘lida o‘zimizni hamisha burchli sezamiz.

Yana bir bor bayramingiz bilan qutlab, hamisha musaffo osmon ostida, yaqinlaringiz va jamiyatimiz ardog‘ida go‘zal va baxtli hayot kechirishingizni tilayman!

Bayramingiz muborak bo‘lsin, azizlar!