Qashqadaryo viloyati hоkimligi

Bugun Qashqadaryo viloyati hokimligi majlislar zalida viloyat hokimi Murotjon Azimov hamda Sport vaziri Adham Ikramov boshchiligida sport sohasi vakillari ishtirokida yig‘ilish o‘tkazildi.

 

Sport boshqarmasi, sport ta’lim muassasalari, sport federatsiyalari, hamkor tashkilotlar, oliy ta’lim, maktabgacha va maktab ta’limi tizimi mas’ullari hamda tuman shahar hokimliklari studiyalari orqali tumanlar vakillari qatnashgan videselektor yig‘ilishi davomida “Besh tashabbus olimpiadasi”ning 2026-yilgi mavsumiga start berilganligi ta'kidlanib, hamkor tashkilotlar ishtirokida ommaviy targ‘ibot masalalari taqdimot ko’rinishida tushuntirildi. Shuningdek, “Prezident olimpiadasi” sport musobaqalarida viloyat sportchilarining natijalari tanqidiy tahlil qilindi.

 

Sport vazirligi tomonidan joriy etilgan “ERP Sport” yagona elektron boshqaruv tizimi orqali yoshlarni ro‘yxatdan o‘tkazish, hisobotlarning shakllanishi va ularning haqqoniyligi masalalari muhokama qilindi. 

 

Yig‘ilish yakunida mas’ullarga ommaviy sport qamrovini kengaytirish, yoshlarni musobaqalarga keng jalb etish, elektron ro‘yxatga olish tizimida shaffoflikni ta’minlash, berilgan topshiriqlar ijrosini qat’iy nazoratga olish bo‘yicha aniq ko‘rsatmalar berildi.

 

Mazkur yig‘ilish yoshlar o‘rtasida ommaviy sportni rivojlantirish va hamkor tashkilotlar ishtirokida tizim samaradorligini oshirishda muhim ahamiyat kasb etadi.

 

Shuningdek, Sport vaziri Qarshi Olimpiya va paralimpiya sport turlariga tayyorlash markazi va Qarshi davlat universitetida ham bo‘lib, ularda o‘quvchi-sportchilar uchun zarur sharoitlarni yaratish borasida olib borilayotgan ishlar bilan tanishdi.