Videoreportaj: Yangiobodda yangi davlat maktabgacha ta’lim tashkiloti foydalanishga topshirildi
2025-07-25 14:00:00 / Yangiliklar
Ana shunday sa’y-harakatlar samarasi o‘laroq, Yangiobod tumanining Xo‘jamushkent mahallasida yangi, zamonaviy 11-sonli davlat maktabgacha ta’lim tashkiloti barpo etilib, foydalanishga topshirildi.
Mazkur ta’lim maskani ochilish marosimida Jizzax viloyati hokimi vazifasini bajaruvchi Ulug‘bek Mustafoyev, viloyat prokurori — adliya katta maslahatchisi Baxtiyor Ibrohimov, mahalladagi nuroniylar, mahalla faollari, ota-onalar hamda keng jamoatchilik vakillari ishtirok etdilar. Tadbirda yangi bog‘chaning ahamiyati, uning bolalar ta’lim-tarbiyasida tutgan o‘rni, shuningdek, oilalar uchun yaratilayotgan qulayliklar xususida alohida to‘xtalib o‘tildi.
Bugungi kun talablariga mos ravishda qurilgan 80 o‘ringa mo‘ljallangan 11-sonli davlat maktabgacha ta’lim tashkilotida bolalar uchun barcha shart-sharoitlar yaratilgan. Muassasa to‘liq ta’mirlangan, zamonaviy mebel va o‘quv jihozlari bilan ta’minlangan. Bu yerda har bir bolaning intellektual, jismoniy va ma’naviy rivoji uchun kerakli muhit yaratilgan.
Muassasada musiqa va badiiy ijodot xonasi, sog‘lomlashtirish burchaklari, kutubxona, hamda bolalar ovqatlanishi uchun sanitar talablarga javob beradigan oshxona mavjud. Shu bilan birga, ekologik tozalik va xavfsizlik talablariga to‘liq amal qilingan.
Bog‘chada o‘z ishiga mas’uliyat bilan yondashuvchi, malakali pedagog-tarbiyachilar faoliyat yuritadi. Ular bolalarni ilk ta’lim bosqichlariga tayyorlash, ularning dunyoqarashi va qobiliyatlarini rivojlantirishga yo‘naltirilgan metodlardan foydalanadi.
Mahalliy aholi yangi bog‘chaning qurilishi va ish boshlaganidan mamnun. Chunki bu kabi zamonaviy muassasalar bolalarning sifatli ta’lim olishi bilan birga, ota-onalarning ish bilan bandligini ta’minlashga ham ijobiy ta’sir ko‘rsatadi.
Ochilish marosimida so‘zga chiqqan viloyat hokimi vazifasini bajaruvchi Ulug‘bek Mustafoyev mahalliy aholini yangi bog‘chaning faoliyat boshlashi bilan samimiy tabriklar ekan, bu kabi tashabbuslar kelajakda ham davom ettirilishini ta’kidladi. Shuningdek, ta’limga investitsiya kiritish — mamlakatning intellektual salohiyatiga eng yaxshi sarmoya ekani ta’kidlab o‘tildi.