Jizzах vilоyati hоkimligi

Forumga respublikamizning qator viloyatlari va tumanlaridan targ‘ibotchilar, otinoyilar, oqila ayollar, faol xotin-qizlar hamda sohaga tegishli mas’ul xodimlar taklif etildi. 
Tadbirni viloyat hokimi vazifasini bajaruvchi Ulug‘bek Mustafoyev kirish so‘zi bilan ochib, jamiyatda diniy bag‘rikenglik va qonuniylikni qaror toptirishda faol fuqarolik pozitsiyasini mustahkamlash mavzusida aynan Jizzax tajribasi asosida o‘tkazilayotgan respublika “Targ‘ibotchilar” forumida eng dolzarb masalalar muhokama qilinib, erishilgan yuqori natijalar asosida muhim yo‘nalishlar belgilab olinishi, kelajakda diniy bag‘rikenglik va mamlakatimizning barqaror rivojlanishi uchun fuqarolarning faol ishtiroki muqarrar ekanligi, barchamizning birgalikdagi sa’yi-harakatlarimiz mamlakatimizda tinchlik va totuvlikni ta’minlashga xizmat qilishiga to‘xtalib o‘tdi. 
Mamlakatimizda Prezidentimiz boshchiligida olib borilayotgan keng ko‘lamli islohotlar markazida, avvalo, inson manfaati, uning huquq va erkinliklarini ta’minlash turadi. Fuqarolar manfaatlarini faqatgina tinchlik va osoyishtalik, o‘zaro hurmat, mehr-oqibat va hamjihatlik muhitini yaratish orqali ta’minlash mumkin. 
So‘nggi yillarda, mamlakatimizda turli millat va elatlar o‘rtasida do‘stlik rishtalarini yanada mustahkamlash, diniy bag‘rikenglik tamoyillarini qaror toptirish borasida keng ko‘lamli islohotlar amalga oshirilmoqda.Bu ezgu tashabbuslar xalqaro hamjamiyatning yuksak e’tirofiga ham sazovor bo‘lmoqda. 
Davlatimiz rahbari 2017-yil 19 sentabrda Birlashgan Millatlar Tashkiloti Bosh Assambleyasining 72-sessiyasida “Ma’rifat va diniy bag‘rikenglik” deb nomlangan maxsus rezolyutsiya qabul qilish tashabbusi bilan chiqqani hamda jahon hamjamiyatining e’tiborini tortgani fikrimizning yaqqol dalilidir. 
Bugungi tahlikali, ziddiyatli zamonda O‘zbekistondagi mavjud dinlararo va millatlaro totuvlik hamda diniy-ma’rifiy sohadagi islohotlar turli davlatlar uchun o‘rnak bo‘layotgani e’tirof etilmoqda. 
Forumda so‘zga chiqqan O‘zbekiston Respublikasi bosh vazir o‘rinbosari, Oila va xotin-qizlar qo‘mitasi raisi Zulayho Mahkamova, Oila va xotin-qizlar qo‘mitasi raisining o‘rinbosari Mukarram Nurmatova, mehnat faxriysi, O‘zbekistonda xizmat ko‘rsatgan madaniyat xodimi, 
“El-urt hurmati” ordeni sohibi Dilbar G‘ulomova, O‘zbekiston Respublikasi Din ishlari bo‘yicha qo‘mita rais o‘rinbosari Matlyuba Qahhorovalar Jizzax tajribasi asosida o‘tkazilayotgan respublika targ‘ibotchilar forumining maqsad va vazifalari, kutiladigan natijalar, yangi ezgu g‘oyalar va masalalarni birgalikda yechishdan iborat ekanligiga to‘htalib o‘tishdi. 
Bo‘lib o‘tgan forumda mutaxassislar tomonidan ishtirokchilar uchun mahorat darslari, vorkshoplar, ko‘rgazli taqdimotlar o‘tkazildi. Bir guruh faol ishtirokchilarga ”Oila va gender” ilmiy tadqiqot instituti tomonidan qo‘llanmalar va risolalar tarqatildi. O‘zbekiston Respublikasi Din ishlari bo‘yicha qo‘mita tomonidan forumda faol ishtirok etgan ishtirokchilarga tashakkurnomalar topshirildi. 
Forumning ikkinchi kuni mehmonlar Zomin tumanidagi “Navbahor”, “Qayirma”, “Mustaqillik” mahallalarida mahalla yettiligi faoliyati, yarashtirish va ajrim yoqasidagi oilalar bilan o‘tkazilayotgan suhbat jarayonlariga guvoh bo‘lishdi. 
“Nuroniylar” maskanida tashkil etilgan milliy liboslar ko‘rgazmasi va chellenji, Suffoga sayohat barchada iliq taassurot qoldirdi.