Jizzах vilоyati hоkimligi

Aniq maqsad va qat’iy iroda bilan tuman hokimi tomonidan boshlangan loyihalar, xususan, tashlandiq yerlarni o‘zlashtirishga qaratilgan chora-tadbirlar nafaqat iqtisodiy samara, balki aholi bandligini ta’minlashda ham muhim ahamiyat kasb etmoqda. 

Shuning yaqqol misoli sifatida, Buxoro SIU hududidagi tashlandiq yerlarni o‘zlashtirish orqali qishloq xo‘jaligini rivojlantirish maqsadida Xitoyning nufuzli Bashiran Co., Ltd kompaniyasi jalb etildi. 
Joriy yilning aprel oyida tuman hokimi Odil Musanov ushbu kompaniya vakillariga Buxoro SIUdagi yerlar ko‘rsatib, ushbu yerlarning unumdorligi yuqori bo‘lsa-da, qarovsiz qolgani natijasida o‘t bosib ketganini ta’kidladi. Ushbu tashrif natijasida xitoylik investorlar yerlarni o‘zlashtirishga qaror qilishdi va bugun bu qaror o‘z samarasini ko‘rsatmoqda. 
Birinchi qadamni qo‘yganlar g‘alabaga yaqin bo‘ladi, deyishadi. Bashiran Co., Ltd ana shunday ilk qadamni qo‘ygan investorlardan biri sifatida tumanda qishloq xo‘jaligi foydalanishdan chiqib ketgan 1400 gektar yer maydoniga auksion orqali egalik xuquqini oldi. Shundan so‘ng Xitoyning zamonaviy texnikalari orqali o‘t bosgan, haddan tashqari qattiq yerlar shudgor qilinib, zamonaviy diskalash uskunalari yordamida maydalanib, ekishga tayyor holatga keltirildi. 
Joriy yil may oyining uchunchi o‘n kunligida Bashiran Co., Ltd kompaniyasi tomonidan tayyorlangan 500 gektar yerlarga zamonaviy chigit ekish selkalari orqali 76x10 sxemada xitoy chigitlari ekilib, eng asosiysi – chigit qator oralariga tomchilab sug‘orish uskunalari ham o‘rnatildi. Hozirda ushbu ekilgan maydonlarda tomchilatib sug‘orish ishlari olib borilmoqda. Bu nafaqat suv tejamliligini ta’minlaydi, balki yuqori hosildorlikni ham kafolatlaydi. 
Shuningdek, qishloq xo‘jaligi foydalanishidan chiqqan yerlarning qolgan joylari ham hozirda ishlov berilib, tajriba tariqasida ushbu yerlarga hamda g‘alladan bo‘shagan yerlarga 90 kunlik xitoy chigitlari ekilmoqda. 
Bashiran Co., Ltd kompaniyasining Arnasoydagi faoliyati faqat qishloq xo‘jaligi bilan cheklanib qolmayapti. Kompaniya mahalliy aholi bandligini ta’minlashda ham faol ishtirok etmoqda. Bugungi kunda ishga qabul qilingan xodimlarga 4,5 million so‘mdan 7 million so‘mgacha oylik maosh belgilangani bo‘lib, soliq to‘lovlari orqali davlat budjetiga ham hissa qo‘shilmoqda. Hozirda ishchi kuchi yanada kengaytirish maqsadida ishga qabul jarayonlari davom etmoqda. 
Haqiqatan ham, tuman hokimi Odil Musanovning tashabbusi bilan yo‘lga qo‘yilgan qishloq xo‘jaligi loyihalari bugun o‘zining ilk samaralarini bermoqda. Bir paytlar tashlandiq holatda bo‘lgan yerlar bugun paxta dalalariga aylanyapti. Bu o‘zgarishlar ortidagi asosiy omil – investorlarga yaratilgan qulay shart-sharoit va ishonchli hamkorlikdir. 
Arnasoy tumanida amalga oshirilayotgan bunday ishlarning yanada ko‘payishi, shubhasiz, tuman iqtisodiyotining rivojiga, yangi ish o‘rinlarining yaratilishiga va aholi turmush darajasining yuksalishiga xizmat qiladi. Chunki iqtisodiy taraqqiyotning asosiy kaliti – investitsiya jozibadorligini oshirish va xalqaro hamkorlikni kengaytirishdir.