Jizzах vilоyati hоkimligi

Sizlarni 2025-yil hosilidan don topshirish bo‘yicha shartnomaviy rejalar bajarilganligi bilan tabriklayman.

Ushbu yutuq bunyodkorlari bo‘lmish – mirishkor dehqon va fermerlar, mohir suvchi va irrigatorlar, o‘z ishining haqiqiy ustasi bo‘lgan mexanizator va agronomlar, sohaning jonkuyar olimlari va mutaxassislariga chuqur hurmat bajo keltirib, chin dildan ta’zim qilamiz.

Ayniqsa, Hurmatli Prezidentimizning sohada yaratib bergan shart-sharoitlari va alohida g‘amxo‘rliklarini eng asosiy poydevor ekanligini qayd etib o‘tmoqchiman.

Dunyodagi eng qadimiy va oliyjanob kasb egalari hisoblangan, el-urt dasturxonini to‘kin va farovon etadigan g‘oyat muhim sohaning zalvorli yukini o‘z yelkasida ko‘tarib kelayotgan sizlar kabi minglab yurtdoshlarimizning fidoyi mehnati va jasorati har qanday yuksak e’tirofga munosibdir.

Albatta, qishloq xo‘jaligi sohasida oson va yengil yilning o‘zi bo‘lmaydi. Tabiat injiqliklari, suv resurslarining cheklangani, turli hasharot va zararkunandalar bilan kurashish har bir dehqondan katta azmu shijoat, mirishkorlik va tajribani talab etadi. Xalqimiz sizlarning ana shunday ibratli fazilatlaringizni yaxshi biladi va yuksak qadrlaydi.

Joriy yilda ham viloyatimiz g‘allakorlari 88,1 ming gektar suvli va 100 ming gektarga yaqin lalmi maydonlarga urug‘ qadab, suvli maydonlarning har gektaridan o‘rtacha 70-80 sentnerdan hosil ko‘tarishdi. Barakali hosil yetishtirishda viloyatning Paxtakor, Do‘stlik, Arnasoy kabi obikor tumanlari, lalmida esa Yangiobod, Baxmal va Zomin kabi tumanlarning hissalari katta bo‘ldi.

Ayniqsa, bu yil 100 dan ziyod fermerlarimiz fidoyilik ko‘rsatib, har gektar g‘alladan 90-100 sentnerdan xirmon ko‘tarishdi. Bu borada, Paxtakor tumanidagi “Anvar A”, Do‘stlik tumanidagi “Asal momo“, Arnasoy tumanidagi “Suyunov Sardor dalasi”, Zafarobod tumanidagi “Yangi tong“, Sharof Rashidov tumanidagi “Qo‘rg‘ontepa”, Mirzacho‘l tumanidagi “Botir Islom”, Zarbdor tumanidagi “Musurmon dov”, Zomin tumanidagi “Bek” fermer xo‘jaliklari nomlarini alohida qayd etib o‘tmoqchiman.

Mavsum yakuni bilan jami 850 ming tonna yoki o‘tgan yilga nisbatan 150 ming tonna ko‘p g‘alla ishlab chiqarilishi kutilmoqda.

Bu yutuqlarga erishishda, ayniqsa, O‘zbekiston Respublikasi Prezidentining 2022-yil 28 maydagi “G‘allani yetishtirish va sotishda bozor tamoyilini joriy etishning qo‘shimcha chora-tadbirlari to‘g‘risida”gi PQ-262-sonli qaroriga asosan sohaga bozor mexanizmlarini keng joriy qilinishi, fermerlarimizda yerga bo‘lgan munosabatni tubdan o‘zgartirib, g‘alla hosildorligini yanada oshirishga, qilgan mehnatlari evaziga katta iqtisodiy daromad topishga bo‘lgan intilishlarini sezilarli darajada kuchaytirdi.

Shuningdek, sifatli urug‘lik tayyorlashga alohida e’tibor berish, ishlab chiqarishga ilmni olib kirish bo‘yicha bergan tavsiyalarga asosan katta maydonlarda g‘allaning Aleksevich, Vassa, Grom, Vexa kabi hosildor navlari ekilishi mo‘l hosil yetishtirishning asosiy garovi bo‘ldi.

Fidoiy fermerlar, qo‘li-qadoq dehqonlarimiz tomonidan, yil boshidan g‘allachilikda amalga oshiriladigan agrotexnika tadbirlarini aniq belgilab, bu borada ishlarni tizimli tashkil qilingani ham o‘z samarasini berdi.

Eskidan gap bor, “Chilla suvi-tilla suvi” degan, bu bejizga aytilmagan. Jonkuyar suvchilarimiz, qishning sovuq kunlariga qaramasdan fidoyilik ko‘rsatishib, g‘allaga chilla suvi berishdi.

Qolaversa, bahor oylarida kamida yana ikki marta sug‘orilganligi,bu borada suv xo‘jaligi tashkilotlarining 2 ming nafar va fermerlarning 5,6 ming nafar suvchilari mehnatlarini alohida e’tirof etishimiz kerak.

Bundan tashqari, g‘alla maydonlarining suv ta’minotini yaxshilash uchun, viloyatda 10 yanvardan - 10 martgacha “Zarbdor 70 kunlik” e’lon qilinib, hashar yo‘li bilan 525 kilometr kollektor, 385 kilometr kanal tozalandi, 86 kilometr kanal ta’mirlandi, 2144 dona lotok almashtirildi.

Natijada, 39 ming gektar g‘alla maydonlarining suv ta’minoti yaxshilanishiga erishildi.

Qolaversa, g‘alla maydonlari gektariga o‘rtacha 600 kilogrammdan azotli, 200-250 kilogrammdan fosforli mineral o‘g‘itlar bilan, 4 marta suspenziya bilan bargidan oziqlantirildi, begona o‘t va kasalliklarga qarshi kimoviy preparatlar bilan ishlov o‘tkazildi.

Shuningdek, tajribali agranomlardan iborat “Oqsoqollar” guruhi tashkil etilib, g‘alla maydonlarida monitoring tizimi joriy qilindi va aniqlangan kamchiliklar peshma-pesh bartaraf qilib borildi.

Shu bilan birgalikda, g‘alla hosili yetishtirish uchun Jamg‘arma tomonidan 317 mlrd. so‘mlik imtiyozli kreditlar ajratilganligini ham qayd etib o‘tmoqchiman.

Hurmatli fermer va mexanizatorlar.

Bu yil g‘alla shartnomaviy rejasining 25 ish kunida bajarilishi, albatta tahsinga sazovor. Ayniqsa, bunda o‘rim-yig‘imning otryad usulida tizimli tashkil qilinishi, ta’minot masalalarning o‘z vaqtida hal etilishi, qolaversa, 27 dona yangi yuqori unumli don o‘rish kombaynlarining xarid qilinishi, otryad rahbarlari, otryadlarga jalb qilingan fidoyi insonlar, mexanizator va tashish texnikalari haydovchilarining bir oila bo‘lib, fidoiylik ko‘rsatganlari asosiy omil bo‘ldi.

Qoraversa, g‘alla o‘rimini tashkil qilishda prokuratura, ichki ishlar, milliy gvardiya, favqulodda vaziyatlar, bojxona boshqarmalari va majburiy ijro burosi kabi tashkilotlar rahbar-xodimlarining mehnatlarini ham alohida e’tirof etib, ularga o‘z minnatdorchiligimni bildiraman.

Hali dalalarimizda o‘rilmay turgan g‘alla maydonlarimiz bor. Ushbu hosilni ham qisqa muddatlarda o‘rib-yig‘ib olishni o‘z oldilariga maqsad qilib qo‘yishdi.

G‘allachilikda erishilgan yuqori natijalar fermerlarimizga 2,2 trln. so‘m daromad olib kelishi kutilmoqda.

Fermerlarimizning iqtisodiy ko‘rsatkichlarini yanada yaxshilash hamda viloyatda ishsizlikni bartaraf qilish maqsadida g‘alladan bo‘shagan 83,5 ming gektar maydonlarga takroriy ekinlar ekish, ijtimoiy daftarlarda ro‘yxatda turgan 18,7 ming nafar ehtiyojmand ishsiz fuqarolarimizga oziq-ovqat mahsulotlari yetishtirish uchun 21 ming gektardan oshiq yer maydonlari ajratib berilib, ekish tadbirlari amalga oshirilmoqda.

Ushbu takroriy maydonlardan 700 ming tonna mahsulot yetishtirish ko‘zda tutilmoqda.

Hurmatli fermer va dehqonlar.

Mamlakatimizning oziq-ovqat xavfsizligini ta’minlash, el-urtimiz dasturxonini yanada farovon qilishda siz kabi fidoyi qishloq xo‘jaligi xodimlari bundan keyin ham o‘zlarining bor bilim va tajribalarini, kuch-g‘ayrat va imkoniyatlarini safarbar etadilar, deb qat’iy ishonaman.

Sizlarni yana bir bor g‘allachilikdagi yutuqlar bilan chin dildan tabriklayman.

Barchangizga sihat-salomatlik, oilaviy baxt-saodat, mas’uliyatli va sharafli mehnat faoliyatingizda ulkan zafarlar, xonadonlaringizga tinchlik-xotirjamlik va qut-baraka tilayman.

Hurmat bilan, Jizzax viloyati hokimi v.b.

U.M.Mustafoyev

 27.06.2025 yil