Jizzaxda ichimlik suvi ta’minotini yaxshilash bo‘yicha tayyorgarlik ishlari davom etmoqda
2025-03-25 09:10:00 / Yangiliklar
Shu jumladan, "Jizzax suv ta’minoti" AJga qarashli barcha ichimlik suvi uzatish va saqlash inshootlarida bahor-yoz mavsumiga tayyorgarlik ishlari qizg‘in davom etmoqda.
Mazkur jarayon doirasida viloyatning turli hududlarida muhim texnik xizmat ko‘rsatish ishlari amalga oshirilmoqda. Xususan, Mirzachul va Zafarobod tumanlaridagi Markaziy suv inshootlarida nasos agregatlarini moylash, elektr shitlarida profilaktika hamda texnik xizmat ko‘rsatish bo‘yicha maxsus tushuntirish va o‘quv seminarlari tashkil etildi.
Ushbu tadbirlar ichimlik suvi ta’minotining barqarorligini oshirish va iste’molchilarga yanada sifatli xizmat ko‘rsatish maqsadida o‘tkazilmoqda. Bunda tajribali mutaxassislar va muhandis-texnik xodimlar jalb etilib, inshootlarning samarali ishlashiga alohida e’tibor qaratilmoqda.
Shuningdek, mavjud suv uzatish tarmoqlarida texnik nosozliklarning oldini olish, inshootlarning barqaror ishlashini ta’minlash hamda suv sifati nazoratini kuchaytirish bo‘yicha rejali tadbirlar amalga oshirilmoqda. Bahor-yoz mavsumining kelishi bilan suvga bo‘lgan talab ortishi inobatga olinib, muhandislik inshootlari doimiy monitoring ostida saqlanmoqda.
Jizzax viloyati aholisiga sifatli ichimlik suvi yetkazib berish jarayonida amalga oshirilayotgan ushbu texnik tayyorgarlik ishlari kelgusida suv ta’minotining uzluksiz va samarali bo‘lishini ta’minlashga xizmat qiladi.