Paxtakor tumanida xonaki o‘rdak yetishtirish yo‘lga qo‘yildi
2025-02-24 09:05:00 / Yangiliklar
O‘rdak deyarli barcha mamlakatlarda, ayniqsa, Xitoy, Indoneziya va Vyetnamda juda ko‘p uchraydi.
Voyaga yetgan erkak o‘rdak vazni 3—4 kg, makiyoni 2,5—3 kg bo‘ladi. Beradigan mahsulotiga qarab o‘rdaklar go‘sht, go‘sht-tuxum yoki tuxum-go‘sht yo‘nalishiga ajratiladi. O‘rdak asosan go‘sht uchun yetishtiriladi. Go‘shti mayin, mazali, parhez mahsulot hisoblanadi. Xo‘jaliklarda zotli o‘rdaklar asosan Pekin o‘rdaklari bilan ifodalanadi.
Kichik fermer xo‘jaliklari va xususiy xo‘jaliklarda oq Moskva, Ukraina oq va kulrang o‘rdagi hamda Xakikempbell va boshqa zotlar boqiladi.
Paxtakor tumanida ham tabiiy sharoitda o‘rdaklarni ko‘paytirish yo‘lga qo‘yildi. Viloyat hokimi vazifasini bajaruvchi Ulug‘bek Mustafoyev tashabbusi bilan Paxtakor tumanida yo‘l yoqasida joylashgan 28-K-1 kollektorining 6 kilometr masofasida o‘rdaklarni parvarishlash va yetishtirish uchun joy ajratildi.
Jizzax viloyat meliorativ ekspeditsiyasi boshqarmasi boshlig‘i Orzibek Xolbekovning ta’kidlashicha, yangi tashkil etilgan o‘rdak yetishtirish xo‘jaligiga 500 dona o‘rdak olib kelinib, bugungi kunda parvarishlanmoqda. Kelajakda o‘rdaklar sonini 20 mingtagacha yetkazish rejalashtirilgan.
Shuningdek, Paxtakor tumanida yo‘l yoqasida joylashgan 28-K-1 kollektorining 6 kilometr masofasidagi joylarda o‘rdak yetishtirish istagida bo‘lganlarga yerlar berilishi Orzibek Xolbekov tomonidan ma’lum qilindi.