Jizzах vilоyati hоkimligi

Mamlakatimizda uy-joy sohasidagi islohotlarni samarali tashkil etish, “Yangi Oʻzbekiston” massivlari va zamonaviy koʻp kvartirali  uylar qurish koʻlamini kengaytirish, ipoteka krediti bozorini yanada rivojlantirish hamda banklar tomonidan oʻz mablagʻlari hisobidan ajratilgan kreditlarni qayta moliyalashtirish mexanizmlarini amaliyotga keng joriy qilish maqsadida Oʻzbekiston Respublikasi Prezidentining 2024-yil 30-apreldagi “2024-yilda ipoteka kreditlarini ajratish mexanizmlarni takomillashtirish va aholining uy-joy sharoitlarini yaxshilashga oid qoʻshimcha chora-tadbirlar toʻgʻrisida”gi Farmoni qabul qilingan edi.

Unga koʻra, Iqtisodiyot va moliya vazirligi, Qurilish va uy-joy kommunal xoʻjaligi vazirligi, Markaziy bank, Kambagʻallikni qisqartirish va bandlik vazirligi hamda Oʻzbekiston Mahallalari uyushmasining bozor tamoyillariga asoslangan ipoteka kreditlari orqali aholini uy-joy bilan taʼminlash dasturi doirasida hududlarda zamonaviy arxitektura koʻrinishiga ega 100 mingta kvartiradan iborat boʻlgan  koʻp qavatli uy-joylar qurish, qurilish jarayonlariga “Yashil” uy-joy standartlarini joriy qilish, kambagʻallikdan chiqarish dasturiga kiritilgan va uy-joy sharoitini yaxshilashga muhtoj boʻlgan shaxslarga yakka tartibdagi uy-joy qurish, rekonstruksiya va taʼmirlash uchun 120 million soʻmgacha ipoteka kreditlari ajratilmoqda   

Mazkur farmonga asosan  viloyatimizda 118 ta 4500 xonadonli koʻp qavatli uy-joylar, shundan, “Yangi Oʻzbekiston” massivlarida 29 ta 1456 xonadonli va boshqa uy-joyga talab yuqori boʻlgan massivlarda 89 ta 3044 xonadonli koʻp qavatli uy-joylar qurilishi belgilangan boʻlib, oʻtgan yili  51 ta 2009 xonadonli koʻp qavatli uy-joylar qurilib, foydalanishga topshirildi.

 Eski shahardan Olmazor Siti yoki Uchtepa tomon yoʻlingiz tushsa, uzoqdan oʻng tarafdagi oq, yashil rang uygʻunlashgan qoʻp qavatli inshoot beixtiyor   eʼtiboringizni tortadi. “Ishtixon Building” MCHJ quruvchilari tomonidan Sharof Rashidov tumanining “Qahramon” MFY hududida ana shu  9 qavatli, uch va ikki xonali 117 xonadonga moʻljallangan uy qurib bitkazildi. Jamiyat quruvchilari tomonidan shu uyga tutash joyda yana ikkita 9 qavatli 72 xonadonga moʻljallangan uy koʻtarilib, usti yopildi. Ayni paytda jamiyat bunyodkorlari tomonidan qad koʻtargan uyning ichki va tashqi qismlarini pardozlash ishlari olib borilayotir.