Sohalarning raqamlashtirilishi xizmat ko‘rsatuvchi tashkilotga ham, aholiga ham qulaylik yaratadi
2025-01-27 09:30:00 / Yangiliklar
Bugungi kunda “Hududgaz Jizzax” gaz ta’minoti filialida faoliyat olib borayotgan 90 nafar mahalla gazchilariga planshet yetkazib berildi.
“Hududgazta’minot” aksiyadorlik jamiyati tomonidan O‘zbekiston Respublikasi Prezidentining “Yoqilg‘i-energiya resurslaridan foydalanish sohasida davlat nazorati samaradorligini oshirish chora-tadbirlari to‘g‘risida”gi qaroriga asosan iste’molchilar bilan ishlashda elektron tizim joriy qilindi. Endilikda mahalla gazchilari tomonidan ortiqcha qog‘ozbozlik ishlari yuritilmaydi. Iste’molchidan esa aksariyat hujjatlar qog‘oz shaklida talab etilmaydi. Iste’molchining shaxsini tasdiqlovchi hujjat orqali uning yashash manzili, tabiiy gaz hisob raqami, iste’mol qilgan gaz miqdori va to‘lov amalaiyotlari mahalla gazchilarining qo‘lidagi planshetda ko‘rinib turadi. Tizim tabiiy gazdan foydalanish qoidalarini buzish bilan bog‘liq huquqbuzarlik bo‘yicha tuzilgan dalolatnomalarni elektron shaklda rasmiylashtirish imkonini beradi.
Ayni kunlarda ushbu planshetlar “Hududgaz Jizzax” gaz ta’minoti filiali xodimlari tomonidan tuman-shahar bo‘limi xodimlariga yetkazib berilib, ishlash tartibi, foydalanishda e’tibor qaratish lozim bo‘lgan juhatlari o‘rgatilmoqda. Shu paytga qadar xizmat faoliyatida qulaylik tug‘diruvchi, qog‘ozbozlikka chekqo‘yuvchi bunday planshetlar yo‘l harakati xavfsizligi, soliq xizmati xodimlarida bo‘lar edi. Gaz ta’minoti tizimiga ham elektron ish yuritish tartibining joriy etilishi tizimdagi ishlar samaradorligini yanada oshiradi. Korrupsiya holatlarining oldini oladi hamda shaffoflikni ta’minlaydi.