Jizzах vilоyati hоkimligi

Uchrashuv davomida viloyat rahbari hududda investorlar uchun yaratilgan qulay ishbilarmonlik muhiti, soliq va bojxona imtiyozlari, infratuzilmaviy imkoniyatlar haqida ma’lumot berdi. 
 
Shuningdek, Jizzax viloyatida Janubiy Koreya Respublikasining qator yirik ishlab chiqarish korxonalari, jumladan avtomobilsozlik va boshqa sanoat tarmoqlaridagi qo‘shma korxonalar samarali faoliyat yuritayotgani ta’kidlandi. Investorlar bilan ishlashda ochiqlik, shaffoflik va tezkorlik tamoyillari izchil amalga oshirilayotgani qayd etildi. 
 
Koreyalik mehmonlar tomonidan “Yashil Makon” umummilliy loyihasi doirasida tuproqni qayta tiklash va uning unumdorligini oshirishga qaratilgan qo‘shma korxona tashkil etish tashabbusi ilgari surildi. Loyiha doirasida sho‘rlashishga qarshi kurashish bilan tuproq unumdorligini oshirish, degradatsiyaga uchragan yer maydonlarini qayta tiklash hamda shahar va qishloq hududlarida yashil maydonlarni kengaytirish ko‘zda tutilgan. 
 
Ma’lumotlarga ko‘ra, mazkur ishlab chiqarish korxonasini tashkil etish uchun taxminan 5 milliard von miqdorida investitsiya kiritilishi rejalashtirilmoqda. Loyiha 3 yillik bosqichlarda amalga oshirilib, mahalliy resurslar bilan Koreyaning ilg‘or texnologiyalari uyg‘unlashtiriladi. Bu esa fermer xo‘jaliklari daromadini oshirish, qishloq xo‘jaligi mahsulotlari hajmini ko‘paytirish hamda milliy oziq-ovqat xavfsizligini mustahkamlashga xizmat qiladi. 
 
Uchrashuvda ta’lim sohasida ham hamkorlik masalalari muhokama qilindi. Delegatsiya tarkibida ishtirok etgan Koreya Aerokosmik universiteti va Aviatsiya biznesi maktabi professori Shavkat Saydaxmedov zamonaviy ta’lim texnologiyalarini mahalliy tizimga joriy etish, mutaxassislar tayyorlash sifatini oshirish bo‘yicha takliflar bildirdi. 
 
Muzokaralar yakunida viloyat hokimi Ulug‘bek Mustafoyev bildirilgan tashabbuslar Jizzax viloyati iqtisodiyotini yanada rivojlantirish, investitsion jozibadorlikni oshirish va ekologik barqarorlikni ta’minlashda muhim ahamiyat kasb etishini ta’kidladi. Shuningdek, takliflarni amalga oshirish bo‘yicha tegishli mutasaddi tashkilotlarga aniq vazifalar belgilandi.