Ichki ishlar vazirligi rahbariyati tomonidan Toshkent viloyati hududida 2025-yil yakuni boʻyicha jinoyatchilikka qarshi kurashish, uning oldini olish, jamoat tartibi va fuqarolar xavfsizligini taʼminlash borasida yigʻilishi boʻlib oʻtdi
2026-01-21 09:00:00 / Yangiliklar
Toshkent viloyati IIBBda Ichki ishlar vazirining birinchi oʻrinbosari, polkovnik Ayubxon Raxmatullayev ishtirokida 2025-yil yakunlariga bagʻishlangan kengaytirilgan yigʻilish boʻlib oʻtdi.
Tadbirda viloyat IIBB rahbariyati, sohaviy xizmat boshliqlari, shuningdek tuman va shahar ichki ishlar organlari rahbarlari hamda ularning oʻrinbosarlari qatnashdi.
Yigʻilishda Bosh boshqarma boshligʻi oʻrinbosari, polkovnik Otabek Xadjayev tomonidan 2025-yil davomida huquqbuzarlik va jinoyatlarning barvaqt oldini olish, sodir etilgan jinoyatlarni “issiq izida” fosh etish, jamoat tartibi, fuqarolar va yoʻl harakati xavfsizligini taʼminlash borasida amalga oshirilgan ishlar, shuningdek mavjud kamchiliklar yuzasidan axborot berildi.
Yigʻilish tanqidiy-tahliliy ruhda oʻtib, vazir oʻrinbosari xodimlarning xizmat intizomiga qatʼiy rioya etishi, qonunchilik talablariga soʻzsiz amal qilishi, xizmat vazifalariga vijdonan yondashishi hamda vatanga, xizmatga va xalqqa sadoqat bilan xizmat qilishi zarurligini alohida taʼkidladi.
Shuningdek, 2026-yilda viloyatda ichki ishlar organlari tomonidan amalga oshirilishi rejalashtirilgan ustuvor vazifalar muhokama qilinib, har bir yoʻnalish boʻyicha aniq chora-tadbirlar belgilab olindi.
Yigʻilish yakunida masʼullarga fuqarolar xavfsizligini taʼminlash, jinoyatchilik va huquqbuzarliklarning barvaqt oldini olish boʻyicha tamomila yangicha tizim asosida ish tashkil etish, shuningdek berilgan vazifa va topshiriqlarni oʻz vaqtida hamda sifatli bajarish yuzasidan tegishli koʻrsatmalar berildi.
Toshkent viloyati IIBB Axborot xizmati