Davlat ekologik ekspertizasi markazi

Tadbir O‘zbekiston Respublikasi Vazirlar Mahkamasining “Atrof-muhitga ta’sirni baholash mexanizmini yanada takomillashtirish to‘g‘risida”gi Qarori talablariga muvofiq, shuningdek Atrof-muhitga ta’sirni baholash loyihasini tayyorlash doirasida “INDEX Consulting Company” MChJ tashabbusi bilan tashkil etildi.

Eshituvda O‘zbekiston Respublikasi Qurilish va uy-joy kommunal xo‘jaligi vazirligi vakili, Toshkent viloyati Ekologiya va atrof-muhitni muhofaza qilish boshqarmasining Quyichirchiq tumani inspektori, Quyichirchiq tumani hokimligi, “Uzsuvtaminot” AJ, Davlat ekologik ekspertizasi markazi, Sanitariya-epidemiologiya xizmati vakillari hamda Surum mahallasi fuqarolari ishtirok etdi.

Tadbirning asosiy maqsadi — rejalashtirilayotgan faoliyat haqida jamoatchilikka batafsil ma’lumot berish, loyihaning atrof-muhit va ijtimoiy muhitga ehtimoliy ta’siri yuzasidan ochiq va konstruktiv muhokama o‘tkazish, shuningdek, barcha manfaatdor tomonlarning fikr va mulohazalarini tinglashdan iborat bo‘ldi.

Eshituv davomida “INDEX Consulting Company” MChJ mutaxassislari tomonidan loyiha mazmuni taqdim etildi. Unga ko‘ra, Surum hududida zamonaviy kanalizatsiya tarmog‘i va oqova suv tozalash inshootlarini qurish rejalashtirilgan. Ushbu inshootlar aholining sanitariya-gigiyena holatini yaxshilash, ekologik xavfsizlikni ta’minlash, shuningdek, chiqindi suvlarni ekologik me’yorlarga mos tarzda tozalashga xizmat qilishi kutilmoqda. Qurilishda zamonaviy texnologiyalardan foydalaniladi, quvurlar va infratuzilma elementlari esa xalqaro standartlarga mos loyihalashtirilgan. Loyiha hududdagi kanalizatsiya tizimini takomillashtirish, tabiiy resurslarga salbiy ta’sirni kamaytirish, aholi salomatligini muhofaza qilishga xizmat qilishini ta’minlash ko‘zda tutilgan.

Tadbirda Surum mahallasi fuqarolari ham faol ishtirok etdilar va o‘z munosabatlarini bildirdilar. Fuqarolarning ta’kidlashicha, kanalizatsiya-tozalash inshootlarining mahalla hududiga juda yaqin joylashuvi kelgusida havoning ifloslanishi, yoqimsiz hidlarning tarqalishi, yerosti suvlarining ifloslanishi kabi ekologik muammolarga sabab bo‘lishi mumkin. Ularning fikricha, bu holat mahalladagi sanitariya holatiga salbiy ta’sir ko‘rsatishi va aholi salomatligiga xavf tug‘dirishi mumkin.

Shuningdek, mahalla aholisi loyihaga doir yetarlicha ma’lumot berilmaganini, qarorlar qabul qilishda jamoatchilik fikri inobatga olinmaganini tanqid qildi. Ular masala chuqurroq o‘rganilishi, muqobil joylashuv variantlari ko‘rib chiqilishi va yakuniy qarorlar aholining manfaatlari asosida qabul qilinishi kerakligini ta’kidladilar.

Ma’lumot uchun, Surum oqova suv tozalash inshooti Quyichirchiq tumanida amalga oshirilishi ko‘zda tutilgan bo‘lib, kanalizatsiya quvurlarini yotqizish Sergeli, Bektemir va Yangihayot tumanlarini qamrab oladi. Kelgusida ushbu tumanlar ham mazkur tozalash inshootiga ulanadi. Loyihaning umumiy maydoni 213 gektarni tashkil etib, kunlik chiqindi suvlarni tozalash quvvati taxminan 1,5 million kub metrga teng (taxminiy).