Termoplastiklar uchun plastifikatorlar ishlab chiqarish faoliyati davlat ekologik ekspertizasi talablari asosida o‘rganildi
2026-07-22 18:00:00 / Yangiliklar
O‘rganish davomida ishlab chiqarish jarayoni texnologik jihatdan ko‘zdan kechirildi. Maʼlum bo‘lishicha, korxonada polietilen granulasi, mikrokalsit uni hamda stearin granulasi (stearin kislotasi) belgilangan nisbatlarda aralashtirilib, uch bosqichli texnologik jarayondan o‘tkaziladi. Natijada tayyor mahsulot granula shaklida hosil qilinib, 25 kilogrammli qoplarga joylanadi.
Tayyor mahsulot polimer mahsulotlarini ishlab chiqarish jarayonida qo‘shimcha komponent sifatida qo‘llanilib, polimer materiallarning plastikligi va elastikligini oshirishga xizmat qiladi.
O‘rganish natijalariga ko‘ra, mazkur faoliyat Vazirlar Mahkamasining “Atrof-muhitga taʼsirni baholash mexanizmini yanada takomillashtirish to‘g‘risida”gi qarori 1-ilovasi – “Davlat ekologik ekspertizasidan o‘tkaziladigan faoliyat turlarining ro‘yxati”ga muvofiq baholandi.
Mazkur ro‘yxatga asosan, termoplastiklar uchun plastifikatorlar ishlab chiqarish faoliyati atrof-muhitga taʼsir ko‘rsatish darajasi bo‘yicha III toifaga mansub bo‘lib, ro‘yxatning 37-bandida nazarda tutilgan polimer buyumlar va sintetik materiallar, shu jumladan yuvish va tozalash vositalarini ishlab chiqarish korxonalari (sexlari) toifasiga muvofiq kelishi aniqlandi.
Amalga oshirilgan o‘rganish ishlari korxona faoliyatining amaldagi ekologik qonunchilik talablariga muvofiqligini baholash hamda davlat ekologik ekspertizasi jarayonlarini belgilangan tartibda tashkil etishga qaratilgan.