Davlat ekologik ekspertizasi markazi

Unda O‘zbekiston Respublikasi Prezidentining ekologiya masalalari bo‘yicha maslahatchisi – Ekologiya va iqlim o‘zgarishi milliy qo‘mitasi raisi Aziz Abduhakimov, BMT Bosh kotibi o‘rinbosari, BMTning Atrof-muhit bo‘yicha dasturi (UNEP) ijrochi direktori Inger Andersen hamda Tabiatni muhofaza qilish xalqaro ittifoqi (IUCN) bosh direktori Gretel Agilar, xalqaro tashkilotlar rahbarlari, diplomatik korpus vakillari, investorlar, ekologik mahsulotlar ishlab chiqaruvchilari, ekoinnovatorlar, davlat organlari va ekspertlar hamjamiyati mas’ullaridan iborat dunyoning 100 dan ortiq mamlakatidan tashrif buyurgan vakillar istirok etdi.
 
– Ushbu ko‘rgazma Markaziy Osiyo va jahon hamjamiyati o‘rtasida innovatsiyalar, investitsiyalar, bilim va aniq yechimlarni birlashtiruvchi “yashil” texnologik ko‘prikni yaratish yo‘lidagi muhim katalizatorga aylansin, – dedi A. Abduhakimov. – “Eco Expo Central Asia 2026” amaliy hamkorlikni shakllantirish, investitsiyaviy jozibador ekologik loyihalarni ishlab chiqish, yangi qo‘shma tashabbuslarni yo‘lga qo‘yish va uzoq muddatli xalqaro hamkorlikni mustahkamlash uchun samarali platformaga aylanishi lozim.
 
Aziz Abduhakimov Samarqandni Markaziy Osiyoning “yashil” investitsiyalar va innovatsiyalar poytaxti, deb e’lon qilish tashabbusini ilgari surdi. U Samaqandning ekologik diplomatiya, “yashil” moliyalashtirish va barqaror texnologiyalarni ilgari surish bo‘yicha xalqaro maydon sifatidagi roli tobora ortib borayotganini ta’kidladi.
 
Ko‘rgazmani tashkil etishdan maqsad iqtisodiyotni eng ilg‘or “yashil” texnologiyalarni joriy etish orqali rivojlantirish va ayni paytda atrof-muhitni kelajak avlodlar uchun asrab-avaylashdan iborat ekani qayd etildi.
 
Ko‘rgazma “yashil” iqtisodiyotni rivojlantirish, ekologik texnologiyalarni joriy etish va barqaror rivojlanish sohasidagi xalqaro hamkorlikni kengaytirishga qaratilgan. Ta’kidlash joizki, 2025-yilda Toshkentda o‘tkazilgan “Eco Expo Central Asia 2025” Markaziy Osiyodagi ilk shunday yirik ekologik ko‘rgazma bo‘lib, qariyb 7,5 ming ishtirokchini birlashtirgan hamda xalqaro hamkorlar bilan birgalikda 130 dan ortiq ekologik loyihalarni ishga tushirish maydoniga aylangan edi.
 
2026-yilda ko‘rgazmada 10 mingga yaqin mahalliy va xorijiy ishtirokchilar qatnashishi kutilmoqda. Ko‘rgazma doirasida ekologik mahsulot va xizmatlarni namoyish etuvchi 68 dan ortiq pavilyon, Markaziy Osiyo ekoinnovatorlari uchun 20 ta startap maydoni tashkil etilgan.
 
Ko‘rgazma doirasida “yashil” energetika, chiqindilarni qayta ishlash, suv resurslarini boshqarish, iqlim o‘zgarishiga moslashish va barqaror rivojlanish masalalariga bag‘ishlangan 50 dan ortiq sayd-ivent, forum va taqdimotlar o‘tkazilmoqda.

Mazkur nufuzli xalqaro ko‘rgazmada Davlat ekologik ekspertizasi markazi ham alohida pavilyon bilan faol ishtirok etmoqda. Markaz tomonidan ekologik ekspertiza, atrof-muhitni muhofaza qilish, zamonaviy ekologik monitoring tizimlari hamda barqaror rivojlanishga qaratilgan loyihalar va xizmatlar namoyish etilmoqda. Ko‘rgazma doirasida mahalliy va xorijiy hamkor tashkilotlar, investorlar hamda ekologiya sohasida faoliyat yurituvchi kompaniyalar bilan qator uchrashuvlar o‘tkazilib, istiqbolli hamkorlik aloqalarini rivojlantirish yuzasidan muzokaralar olib borilmoqda.