Davlat ekologik ekspertizasi markazi

Davlat ekologik ekspertizasi markazida uzoq yillar ishlab, nafaqaga chiqqan mehnat faxriylari qadrlanib, ularning hayot yo‘li va xizmatlari e’tirof etilmoqda. Markaz xodimlari zahmatli mehnati bilan ekologiya sohasini yangi bosqichga ko‘tarishga ulkan hissa qo‘shgan faxriylarni Xotira va qadrlash kuni munosabati bilan xonadonlarida bo‘lib, ularning holidan xabar oldi.
 Muloqotlar davomida faxriylarning ko‘p yillik fidokorona mehnati va mamlakat taraqqiyotiga qo‘shgan hissasi e’tirof etildi. Ularning boy ish tajribasi, atrof-muhit muhofazasi yo‘lida erishgan yutuqlari yodga olindi. Bu kabi muloqotlar nafaqat faxriylarga quvonch bag‘ishladi, balki yosh mutaxassislar uchun ham haqiqiy hayot maktabi vazifasini o‘tadi.
 Uzoq yillik tajribaga ega bo‘lgan ustozlarning maslahatlari bugungi kunda ekologik ekspertiza jarayonlarini takomillashtirish va tizimda shaffoflikni ta’minlashda muhim ahamiyatga ega ekanligi ta’kidlandi. Faxriylar ko‘rsatilgan bunday e’tibor va g‘amxo‘rlikdan mamnun bo‘lib, yurtimiz tinchligi, tabiat muhofazasi yo‘lida olib borilayotgan ishlarga rivoj tilab, duolar qildi.