Davlat ekologik ekspertizasi markazi

Jamoat eshituvi Urgut tumani “Mergancha” MFY, “Mergancha” ko‘chasida joylashgan hududda “SAM-NEGIN” MChJ tashabbusi bilan o‘tkazildi. Unda loyiha tashkiloti vakillari, qo‘shni hudud aholisi hamda “Davlat ekologik ekspertizasi markazi” davlat muassasasining Samarqand viloyati filiali mutaxassislari ishtirok etdi.

Loyihaga ko‘ra, mazkur hududda gilam ishlab chiqarish sexi faoliyatini amalga oshirish rejalashtirilgan. Jamoat eshituvi davomida atrof-muhitga ko‘rsatilishi mumkin bo‘lgan ta’sirlar, ekologik xavfsizlik masalalari hamda sanitariya talablariga rioya etilishi yuzasidan muhokamalar olib borildi.

Xususan, buyurtmachi korxona mas’ul xodimlariga O‘zbekiston Respublikasi Prezidentining 2021-yil 30-dekabrdagi PF–46-son Farmoniga muvofiq obyekt atrofini ko‘kalamzorlashtirish, mavjud daraxtlarni asrab-avaylash va ularga shikast yetkazmaslik bo‘yicha tegishli ko‘rsatmalar berildi. Shuningdek, O‘zbekiston Respublikasi Vazirlar Mahkamasining 2018-yil 2-oktabrdagi 787-son qaroriga muvofiq, maishiy chiqindilarni to‘plash uchun alohida maydoncha tashkil etish, qattiq maishiy chiqindilar uchun bir-biridan 10 metr masofadan oshmagan holda 1–2 dona chiqindi qutilarini o‘rnatish lozimligi ta’kidlandi.

Qurilish ishlari olib borilayotgan hududdagi barcha daraxtlarni oldindan sanoqdan o‘tkazish, shuningdek, davlat ekologik ekspertizasi xulosasida belgilangan barcha talab va shartlarga qat’iy amal qilish zarurligi alohida qayd etildi.

Jamoat eshituvida ishtirokchilar tomonidan bildirilgan fikr va takliflar inobatga olinib, qo‘shimcha tavsiyalar berildi. Muhokamalar yakunlariga ko‘ra, qatnashuvchilarning roziligi bilan loyiha ma’qullandi.