Davlat ekologik ekspertizasi markazi

ISO 37001:2016 — tashkilotlarda korrupsiya va poraxo‘rlikka qarshi kurashish, ularning oldini olish, aniqlash va bartaraf etishga qaratilgan korrupsiyaga qarshi boshqaruv tizimini joriy etish bo‘yicha talab va tavsiyalarni belgilovchi xalqaro standart hisoblanadi. Ushbu standart barcha turdagi tashkilotlar uchun mo‘ljallangan bo‘lib, faoliyatda shaffoflik va halollik madaniyatini mustahkamlashga xizmat qiladi.

Sertifikat topshirish marosimida so‘zga chiqqan CERT International sertifikatlashtirish organi direktori Ibragimov Riad Asimovich Davlat ekologik ekspertizasi markazida korrupsiyaga qarshi boshqaruv tizimi xalqaro standartlar talablariga to‘liq muvofiq joriy etilganini ta’kidladi. Uning so‘zlariga ko‘ra, o‘tkazilgan mustaqil audit natijalari markazda shaffoflik, halollik va hisobdorlik tamoyillariga asoslangan samarali tizim shakllanganini tasdiqladi. Mazkur sertifikat markaz faoliyatiga bo‘lgan xalqaro ishonchni yanada mustahkamlashi qayd etildi.

ISO 37001:2016 xalqaro sertifikatini qo‘lga kiritish Davlat ekologik ekspertizasi markazining korrupsiyaga qarshi yo‘nalishda tizimli va izchil yondashuv asosida faoliyat yuritayotganini yana bir bor tasdiqlaydi. Shu bilan birga, ushbu yutuq davlat idoralari hamda xalqaro hamkorlar o‘rtasida markazning nufuzi va ishonchini yanada oshiradi.

Sertifikatlangan korrupsiyaga qarshi boshqaruv tizimi markaz xodimlaridan o‘z xizmat vazifalarini bajarishda qonuniylik, halollik va shaffoflik tamoyillariga qat’iy rioya etishni talab qiladi. Bu esa tashkilot faoliyatida mas’uliyat, ochiqlik va hisobdorlik darajasini oshirishga xizmat qiladi.