Davlat ekologik ekspertizasi markazi

Tadbirda Ekologiya, atrof-muhitni muhofaza qilish va iqlim o‘zgarishi vazirligining Davlat ekologik ekspertizasi markazi, tuman hokimligi, ekologik inspeksiya, qurilish va kommunikatsiyalar bo‘limlari, kommunal xo‘jalik, ekologiya va ko‘kalamzorlashtirish masalalari bo‘yicha mutaxassislar, shuningdek, qishloq va suv xo‘jaligi, elektr tarmoqlari, suv ta’minoti sohalarining vakillari, tuman kadastr xodimlari hamda mahalla faollari ishtirok etdi.

Eshituvlar davomida loyihaning texnik-iqtisodiy asoslari, muhandislik va ekologik baholash ishlari xalqaro talablarga muvofiq olib borilayotgani ta’kidlandi. “Juru Energy Consulting” MCHJ tomonidan loyihaning muhandislik va ekologik tahlil ishlari amalga oshirilayotgani, mehnat xavfsizligi, atrof-muhitni asrash hamda jamoat manfaatlarini himoya qilish loyihaning ustuvor yo‘nalishlaridan biri ekani qayd etildi.

Shuningdek, qurilish jarayonida atmosferaga chiqariladigan zararli tashlamalarni kamaytirish, qazish ishlari chog‘ida flora va faunaga salbiy ta’sir ko‘rsatmaslik hamda barcha jarayonlarni ekologik monitoring tizimi orqali nazorat qilish zarurligi alohida e’tirof etildi.

Ma’lumot o‘rnida, loyiha “O‘zbekiston milliy elektr tarmoqlari” AJ hamda Osiyo taraqqiyot banki (OTB) hamkorligida amalga oshirilmoqda. Hozirda loyiha uchun Loyihani baholash hujjati (LBH) ishlab chiqilmoqda. Unga ko‘ra, Sirdaryo viloyatidagi “Yangi Sirdaryo” nim stansiyasidan Toshkent viloyatidagi “Xalqa” nim stansiyasigacha 96 kilometr masofada 500 kV kuchlanishli elektr uzatish havo tarmoqlari qurilishi rejalashtirilgan.

Loyihaning asosiy maqsadi — mamlakat energetika tizimining ishonchliligini ta’minlash, elektr ta’minotidagi uzilishlarni kamaytirish va hududlarni barqaror energiya bilan ta’minlashdan iborat.

Loyiha amalga oshirilgach, Sirdaryo va Toshkent viloyatlarida elektr ta’minoti barqarorlashadi, tizimdagi yuklama mutanosib taqsimlanadi hamda aholi va ishlab chiqarish korxonalari uchun elektr energiyasi sifatini oshirishga erishiladi.