25-may kuni Samarqanddagi “Mo‘jiza” amfiteatrida Madaniyat vazirligi huzuridagi Kinematografiya agentligi buyurtmasiga binoan Samarqand viloyati hokimligi bilan hamkorlikda “Ezgu film” studiyasi tomonidan yaratilgan “Amir Bahodir Yalangto‘sh” tarixiy-badiiy filmining premyerasi o‘tkazildi. 

Tadbirning rasmiy ochilish qismida Agentlik direktori Firdavs Abduxoliqov, viloyat hokimi Erkin Turdimov, Agentlik direktori o‘rinbosari Shuhrat Rizayev, tarix fanlari doktori Erkin Musurmonov so‘zga chiqdi. Shuningdek, filmning ijodiy jamoasi a’zolari: prodyuser Zafar Yo‘ldoshev, rejissyor Jahongir Ahmedov, ssenariy mualliflari Hasan Toshxo‘jayev (va Jahongir Ahmedov), aktyorlar Habibulla Nizomov, Boir Xolmirzayev, Matyoqub Matchonovlar tanishtirildi. Undan keyin “Amir Bahodir Yalangto‘sh” tarixiy-badiiy filmining Samarqand shahridagi keng jamoatchilik uchun namoyishi o‘tkazildi. 
       
Kinokartinada buyuk sardor, Registon majmuasi bunyodkori, Samarqandga hokimlik qilgan sarkarda Bahodir Yalangto‘shning hayot yo‘li va faoliyati hikoya qilinadi. Amir Yalangto‘sh avvalo mohir harbiy sarkarda edi. U Buxoro xonligining ikki sulola davrida ham barcha harbiy yurishlarida ishtirok etgan, yirik g‘alabalarni qo‘lga kiritgan. Ammo uning Abdullaxon davridagi harbiy yurishlari haqida ko‘p narsa ma’lum emas. Lekin Ashtarxoniylar davlatining mustahkamligi, chegaralar daxlsizligi, tashqi dushmanlarning tajovuzlariga qarshi turishda Nizomiddin Yalangto‘shning xizmati buyukdir.
  
Ma’lumot uchun, 30-may, payshanba kuni Toshkent shahrida ham buyuk sardor va sarkarda haqidagi “Amir Bahodir Yalangto‘sh” filmining katta premyerasi o‘tkazilishi rejalashtirilgan.