Videoreportaj: Zomin tumanida ichki ko‘chalar obodonlashtirilib, aholi uchun qulay sharoitlar yaratilmoqda
2025-07-04 09:25:00 / Yangiliklar
Mazkur dastur orqali mahalliy aholining tashabbuslari va ovozlari asosida muhim loyihalar moliyalashtirilmoqda hamda joylardagi muammolar bosqichma-bosqich hal etilmoqda.
Ayni paytda “Gulshan” mahallasining ichki yo‘llarini ta’mirlash ishlari uchun 1 milliard 398 million so‘m mablag‘ yo‘naltirildi. Bu mablag‘ evaziga umumiy uzunligi 4 155 metr bo‘lgan ichki ko‘chalarga sifatli asfalt qoplamasi yotqizilmoqda. Bu esa fuqarolarning kundalik hayotida muhim ahamiyat kasb etadigan transport qatnovini yaxshilash, bolalar va keksalar uchun xavfsiz harakatlanish sharoitini yaratishga xizmat qilmoqda.
Qurilish ishlari “LAYLAK-UYA KAR'ER STROY” mas’uliyati cheklangan jamiyati tomonidan amalga oshirilmoqda. Ushbu tashkilot zamonaviy texnika va ilg‘or texnologiyalardan foydalangan holda ishlarga javobgarlik bilan yondashmoqda. Asfaltlash ishlari belgilangan muhlat va talablarga muvofiq ravishda tezkor hamda sifatli tarzda olib borilmoqda.
Yo‘llarning ta’mirlanishi nafaqat aholi uchun qulaylik yaratadi, balki mahallaning umumiy ko‘rinishi va ekologik holatiga ham ijobiy ta’sir ko‘rsatadi. Shu bilan birga, yangi asfaltlangan yo‘llar orqali tadbirkorlar va xizmat ko‘rsatish sohasi vakillari faoliyati yanada faollashishi kutilmoqda.
Mahalliy aholi bu kabi islohotlarni katta mamnuniyat bilan qarshi olmoqda va o‘z yashash joylarining yanada ravnaq topishiga ishonch bildirmoqda.
Bu kabi amaliy ishlar Prezidentimiz tashabbuslari bilan yo‘lga qo‘yilgan “Ochiq budjet” mexanizmi samarali ishlayotganini yana bir bor tasdiqlaydi. Eng muhimi, fuqarolar o‘z ovozlari orqali mahallasi taqdirida bevosita ishtirok etish imkoniga ega bo‘lmoqda.