“Қишлоқ жойларни барқарор ривожлантириш” лойиҳаси доирасида дастлабки объектлар очилиши бўлиб ўтмоқда
2025-03-24 12:59:00 / Вазирлик янгиликлари
Айни вақтга қадар Қорақалпоғистон Республикаси, Хоразм ва Бухоро вилоятларида дастлабки 12 та объект – мактабгача таълим ташкилотлари, оилавий поликлиникалар ҳамда маҳалла марказларининг очилиш маросимлари бўлиб ўтди.
Ўзбекистон Республикаси Президентининг 2021 йил 18 сентябрдаги ПҚ-5246-сонли “Ислом тараққиёт банки ва ОПЕК халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш чора-тадбирлари тўғрисида”ги қарори асосида амалга ошириб келинаётган мазкур лойиҳа давомида 20 та тумандаги жами 939 та объектда қурилиш, реконструкция қилиш ва мукаммал таъмирлаш ишлари режалаштирилган.
Аҳамиятли жиҳати шундаки, ҳудудларда қурилиши давом этаётган ижтимоий соҳа ва инфратузилма объектлари маҳаллий аҳоли истак ва эҳтиёжларидан келиб чиққан ҳолда, уларнинг бевосита иштироки орқали танланган бўлиб, бунда маҳаллаларнинг ихтисослашуви ҳамда ўзига хослиги инобатга олинган.
Хусусан, лойиҳа доирасида қуриладиган 3 қаватли Маҳалла маиший хизмат кўрсатиш марказлари аҳолига турли хизматлар кўрсатишга мўлжалланган бўлиб, бинода гўзаллик салони, сартарошхона, дорихона, банк вакиллари учун махсус хоналар, ёшлар учун ўқув марказлари, маҳалла фуқаролар йиғини раиси, ҳоким ёрдамчиси, хотин-қизлар фаоли, ёшлар етакчиси ва профилактика инспектори учун хизмат хоналари жойлашади. Шунингдек, маҳаллий тадбиркорларга имконият сифатида тикувчилик хонаси, маиший техника ва қандолатчилик устахоналари ва савдо дўкони ҳам фаолият кўрсатади.
Бу каби марказлар қишлоқ аҳолиси учун кўп томонлама қулайлик яратиш билан бир қаторда, тадбиркорлик ва ҳунармандчиликни ривожлантириш, бандликни ошириш, маҳаллий иқтисодиётни ривожлантиришда ҳам муҳим аҳамият касб этади.
Бугунги кунда олис ҳудудларда дастлабки босқичда 100 дан ортиқ янги қурилиш бўйича сублойиҳалар қизғин давом этмоқда, мукаммал таъмирлаш ва реконструкцияни ўз ичига олувчи қолган объектларда ҳам жорий йилнинг ИИ-чорак якуни билан қурилишлар бошланиши кутилмоқда.
“Қишлоқ жойларни барқарор ривожлантириш” лойиҳасини амалга ошириш орқали ҳудудларни комплекс ривожлантириш, уларда йўл-транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш ва аҳоли турмуш маданиятини юксалтириш мақсад қилинган.